DILI, STLTIMORLESTE.com – Timor-Leste presiza justisa ne’ebé forte hasoru krime droga, la’os justisa ne’ebé fasil fó liberdade ba ema ne’ebé akuzadu lori droga tama iha rai laran.
Kestaun ne’e hato’o husi Akademista Universidade Nasionál Timor-Lorosa’e (UNTL), Martinho da Silva relasiona ho desizaun Tribunál Judisiál Primeira Instánsia Dili ne’ebé foin lalais fó liberdade ba sidadaun Australia ida ne’ebé akuzadu iha kazu droga.
“Timor presiza justisa forte, la’os justisa ne’ebé fó liberdade ba droga. Se ita kontinua fó fasil, ita nia joven sira mak sei sai vítima,” dehan Martinho ba STL, iha Kaikoli, Tersa (22/09/2026).
Tuir nia, desizaun Tribunál ne’e fó impaktu boot ba konfiansa públiku nian ba sistema justisa.
“Públiku agora husu, justisa ne’e forte duni ka lae. Tanba ema haree, kazu droga ne’e boot, maibé ema hetan liberdade fasil,” nia dehan.
Nia husu Ministériu Públiku atu halo rekursu tuir dalan legál.
“Ministériu Públiku tenke hatudu servisu. Tenke halo rekursu. Se lae, ema barak sei hanoin katak iha buat ruma iha kotuk,” nia tenik.
Iha parte ketak, Observadór Polítika, Antonio Nagno konsidera desizaun ne’e bele fo mensajen sala ba públiku kona-ba luta kontra droga.
“Kazu droga la’os kazu ki’ik. Se ita fó liberdade fasil, ita hanesan fó lisensa ba ema seluk atu kontinua lori droga mai Timor,” dehan Antonio ba jornalista sira.
Nia hatutan, estadu tenke hatudu seriedade se lae joven Timor-Leste mak sei sai vítima ba krime organizadu ne’e.
Antes nee Membru Komisaun B, Deputadu Luis Roberto, hatete katak autoridade seguransa foin lalais ne’e identifika sidadaun estranjeiru ida husi Australia ne’ebé alegadamente lori droga tama mai Timor-Leste.
Tuir nia esplikasaun, autoridade kompetente aprezenta suspeitu ne’e ba Ministériu Públiku, hamutuk ho evidénsia ne’ebé rekolla durante prosesu investigasaun, atu submete ba tribunal. Maibé, tuir nia, tribunal deside fó liberdade tanba konsidera evidénsia ne’ebé Ministériu Públiku aprezenta seidauk sufisiente.
“Hau triste oituan bainhira ita-nia setór justisa, bainhira ita-nia autoridade seguransa sira halo servisu atu identifika ema estranjeiru sira ne’ebé lori aimoruk sira hanesan droga tama rai laran, maibé bainhira prosesu juridiku lao, sira fó livre tanba evidénsia ne’ebé iha la forte,” hatete Luis.
Entretantu to’o notísia ne’e STL hatun, Tribunál seidauk fó esplikasaun ofisiál kona-ba baze legál ba desizaun liberdade ne’e.
(car)
