DILI, STLTIMORLESTE.com – Bolseiru Timoroan neebe pasa ona selesaun bolsu estudu ba eskola iha nasaun Brasil sente kontente, tanba bele liu iha oportunidade ida nee. Husu ba Timoroan sira atu labele lakon oportunidade hodi tuir no konkore ba bolsu estudu.
Bolseiru Joaquina Rainha Fatima Conceição hatete, nia parte kontente tebes wainhira liu iha selesaun bolsu estudu ba lisensiatura iha area edukasaun nian, iha departamentu ensinu de pedalogia. No daudaun nee sira mai foti ona pasaporte iha Fundo de Desenvolvimento do Capital Humano (FDCH), hodi hein no prepara halo viajen ba sira nia estudu iha nasaun Brasil.
“Ohin mai iha FDCH foti hau nia pasaporte, hodi hein loron aranka ba halao estudu iha Brasil. Hau pasa bolsu estudu nee ba iha lisensiatura, iha area edukasaun, departamentu ensinu de pedalogia,” dehan nia ba STL iha edifisiu FDCH, Colmera, Kinta (23/07/2026).
Nia hatete, durasaun no tempu ba posesu estudu lisensiatura neebe FDCH fo hatene ba sira mak sakalar no mais 5 anos.
Konaba finanseiru bolsu estudu nee nian 100% FDCH mak finansia hotu, bolseiru sira prepara deit ba viajen nian liu liu ba sasan sira. Kona ba viza no tiket FDCH sira mak responsabiliza hotu.
“Hau mai husi Eskola anterior CAFE de Same. Hau senti kontenti tebes tanba sei iha oportunidade bele liu iha bolsa estudu ida nee, tanba ida nee mos hau nia mehi ida dezde kiik. Neebe husi pai ho mãe hakarak tebes husi familia uma laran nain ida tenke sai ba rai liur. Ho objetivu ida nee mak hau hakarak tuir hodi bele konkretiva pai ho mãe sira nia hakarak,” haktuir nia.
Nia husu ba Timor oan sira oportunidade husi FDCH nee diak tebes, keta lakon oportunidade ida nee. Tanba kada tinan FDCH sira loke bolsu estudu ba Timor oan sira hotu, tanba nee labele lakon oportunidade hodi tuir.
Nia hatutan, bainhira remata iha estudu, nia parte sei kontribui diak liu tan ba nasaun liu-liu iha area ensinu de pedajogia. Tanba iha Timor nee iha dezafiu barak tebes ba iha area ida nee, no liu husi oportunidade neebe nia liu ona, bele loke fali formasaun ba maluk sira neebe mak hakarak atu tuir formasaun iha area ida nee.
Nunee mos Bolseiro Antonio Ribeiro dos Santos husi Eskola CAFE Likisa dehan, kontente tebes bele liu selesaun ba bolsu estudu ida nee, tanba nee mak nia mehi dezde kiik.
“Hau sente kontente tanba bele liu bolsu estudu ida nee, nee mak hau nia mehi husi SMA kedas no bele realiza duni. Nee mos hetan suporta husi inan aman, maun no alin sira hotu,” dehan nia.
Nia haktuir, bolsu estudu husi nasaun Brasil nee konkore hotu ba lisensiatura, maestradu no dotoramentu hamutuk kala 100 resin mak selesionadu ba bolsu estudu nee.
Iha fatin hanesan diariu nee atu halo konfirmasaun ho Diretor FDCH, maibe laiha fatin.
(dom)
