DILI, STLTIMORLESTE.com — Primeiru Ministru (PM), Kay Rala Xanana Gusmão hatete, Timor-Leste ukun aan ona tinan 24, maibé ekonomikamente nasaun sei depende ba sasán no produtu importasaun husi rai liur. Tanba nee husu hasae produsaun rai laran.
Nia enkoraja feto emprezária no empreendedora sira atu aumenta produsaun lokal hodi reduz importasaun no fortalece ekonomia nasional.
Primeiru Ministru Xanana Gusmão hatete iha diskursu bainhira halo lansamentu ba Workshop Preparasaun Munisipál ba Konferénsia Nasionál ba Feto Emprezária no Empreendedora sira, iha Salaun CCD, Sábadu (19/09/2026).
“Tinan 24 ona ukun aan, iha bandeira, iha Prezidente, iha Governu, iha Hino Nasionál, maibé ekonomikamente ita sei depende mos,” dehan Primeiru-Ministru Xanana Gusmão.
Nia hatete katak, independénsia la’ós de’it kona-ba símbolu no instituisaun estadu, maibé presiza mos kapasidade ekonomia nasional atu produz no sustenta nesesidade povu.
Iha oportunidade ne’e, Primeiru-Ministru apresia katuas no ferik sira ne’ebé, tuir nia, halo sakrifísiu iha luta ukun-rasik-an hodi jerasaun ohin bele moris no kontribui ba nasaun.
“Ohin hamutuk mai diskute hamutuk saida mak sei halo nuudar feto hodi fó ba rai ida-ne’e,” dehan Xanana.
Xefe Governu mos husu jovem sira atu la hein de’it Estadu fó servisu ka apoiu, maibé tenke haree ba kontribuisaun ne’ebé sira bele fó ba nasaun.
“Labele husu ba Estadu saida mak Estadu fó ba imi. Husu ba imi nia aan rasik saida mak imi bele fó ba Estadu,” dehan Xanana.
Nia hatete katak, joven sira tenke buka oportunidade atu kria atividade produtiva no partisipa iha dezenvolvimentu nasaun, duke hein de’it oportunidade servisu iha instituisaun Estadu.
Xefe Governu hatutan, feto iha papel importante iha ekonomia. Xanana mos husu feto emprezária no empreendedora sira atu identifika área, setor no atividade ekonomia ne’ebé sira iha potensial atu dezenvolve.
Nia enkoraja feto sira atu servisu hamutuk, inklui liuhusi koperativa, no aproveita potensial ne’ebé iha kada komunidade atu dezenvolve negósiu no produsaun lokal.
“Feto sira prepara aan iha atividade saida mak bele prepara aan iha ekonomia Timor nian ne’ebé dudu ba progresu,” dehan Xanana.
Nia mos husu feto emprezária sira atu la’ós fa’an de’it sasán importasaun, maibé buka oportunidade atu kuda, produz no promove produtu lokal, liuliu ai-han, hodi ajuda reduz dependénsia ba importasaun. “Papel feto importante iha ekonomia,” hakotu Primeiru-Ministru.
(eme)
