DILI, STLTIMORLESTE.com – Ministru Defeza Kontra Almirante, Donaciano Costa Gomes “Pedro Klamar Fuik” hatete, tinan nee Ministeriu Defeza prioridade projetu infraestrutura militar haat (4), hanesan konstrusaun portu Komponente Naval, infraestrutura militar iha Beduku, Bobonaro, baze operasional no rezidensia ba militar sira.
Foin daudaun Ministru Defeza partisipa iha reuniaun Konselhu Administrasaun Fundu Infraestrutura relata projetu Ministeriu Defeza nian, neebe sei halo tinan nee mak iha haat,” dehan Ministru Defeza Kontra Almirante, Donaciano Costa Gomes “Pedro Klamar Fuik” ba jornalista sira iha Kuartel Jeral F-FDTL Fatuhada, Dili, Kuarta (29/1/2025).
Klamar Fuik esplika, projetu haat neebe mak sei halo tinan nee mak konstrusaun ba Portu Komponente Naval, infraestrutura militar iha Beduku, Postu Administrativu Bazartete Munisipiu Likisa, infraestrutura militar iha area Dama-Laran neebe lokaliza iha Postu Administrativu Atabae, Munisipiu Bobonaro no baze operasional inklui rezidensia ba militar sira. Maibe indemnizasaun ba komunidade sira afeta ba infraestrutura militar iha Beduku, Ministeriu Defeza rezolve ona.
“Ita boot sira hatene orsamentu neebe preve ba Ministeriu Defeza no Forsa Defeza nian ba tinan nee iha milhaun US$ 45, ida nee orsamentu sustentasaun Ministeriu Defeza no forsa armadas ho estrutura neebe relevante iha Ministeriu Defeza nia okos,” nia informa.
Iha fatin ketak, Akademista UNPAZ, Fakuldade Direitu, José Mouzinho de Jesus esplika, orsamentu ho montante milhaun US$ 45 neebe Governu koloka ba Ministeriu Defeza nee laos osan kiik, tanba nee Ministeriu Defeza tenke iha planu ba projetu.
“Ita rona haree ona iha media katak, iha projetu haat neebe mak sei halo tinan nee mak konstrusaun ba Portu Komponente Naval, infraestrutura militar iha Beduku, Postu Administrativu Bazartete, Munisipiu Likisa, infraestrutura militar iha area Dama-Laran neebe lokaliza iha Postu Administrativu Atabae, Munisipiu Bobonaro no baze operasional inklui rezidensia ba militar sira, ida importante duni ba sira,” nia afirma.
(jen)