DÍLI, STLTIMORLESTE.com – Durante férias judisiárias ne’ebé hahú iha loron 1 fulan Agostu to’o loron 15 fulan Setembru, Tribunal Judisial Primeira Instánsia Dili (TJPID) hala’o julgamentu ba prosesu ho natureza urjente hamutuk 28.
Tuir Juiz Administradór Tribunal Judisial Primeira Instánsia Dili (TJPID), Yudi Pamukas, durante férias judisiárias Tribunal kontinua funsiona hodi atende prosesu sira ne’ebé ho natureza urjente.
“Durante férias judisiárias Tribunal Primeira Instánsia Dili (TJPID), ita konsege atende prosesu primeiru interogatóriu hamutuk 19, prosesu sumáriu hamutuk 2 no prosesu sivíl providénsia kautelar hamutuk 7,” dehan Juiz Administradór ba jornalista sira iha Kaikoli, Kinta (17/09/2026).
Nia hatutan katak, prosesu sira iha primeiru interogatóriu ne’e Ministériu Públiku (MP) halo promosaun ba Tribunal ho alegasaun krime hanesan burla informátika, jogu ilícitu, brankamentu kapitál, asosiasaun kriminóza, ofensa integridade fízika simples no pekulatu de uzú.
Nia esplika katak, medida ne’ebé Tribunal aplika ba prosesu primeiru interogatóriu mak hanesan medida kausaun, aprezentasaun periódika no, iha kazu balu, medida prizaun preventiva.
Iha fatin ketak, jurista Sergio Dias Quintas dehan, lei fó fatin atu durante férias judisiárias kazu urjente sira kontinua hetan atendimentu husi Tribunal.
“Tribunal kontinua atende prosesu urjente. Iha prosesu primeiru interogatóriu, Tribunal deside de’it medida saida maka aplika ba arguidu sira atu asegura arguidu sira iha prosesu investigasaun,” dehan nia.
Nia hatutan tan katak, ba prosesu sumáriu, se hatudu katak prosesu ne’e kona-ba flagrante delito, tama mos iha kategoria urjénsia. Iha prosesu ne’e, Tribunal liuhusi juiz bele deside kedas kona-ba arguidu sira.
Tuir observasaun STL, durante férias judisiárias, prosesu ho natureza primeiru interogatóriu barak liu mak kazu rede scamming call centre. Husi kazu sira ne’e, Tribunal deside aplika medida kausaun, proibisaun ba ausénsia no balu hetan medida prizaun preventiva.
(ter)
