DILI, STLTIMORLESTE.com – Governu Timor Leste (TL) no Australia ofisialmente inaugura projetu demonstrasaun estrada betaun reforsadu ho fibra (FRC) dahuluk iha Suku Lihu-Samalete, Railaku, Munisípiu Ermera.
Tuir komunikadu imprensa neebe STL asesu husi media Embaixada Australia iha TL hatete, inagurasaun nee ofisializa husi Ministru Obras Publika (MOP), Samuel Marçal hamutuk ho Embaixadora Austrália iha Timor-Leste, Caitlin Wilson no Prezidente Autoridade Munisipál Ermera,José Martinho dos Santos Soares iha Kinta (11/06/2026) iha Lihu-Samalete, Railaku, Munisípiu Ermera.
Liu husi komunikadu nee Ministro Samuel Marçal hatete, projetu ida nee marka demonstrasaun dahuluk ba teknolojia FRC iha Timor-Leste, iha neebe koko teknolójia estrada inovativu no reziliénte ba klima hodi hametin infraestrutura no apoia komunidade sira iha nasaun laran tomak. Projetu nee implementa liuhusi parseria metin entre Governu Timor-Leste no Austrália ho apoiu hosi Austrália nia programa PARTISIPA.
“FRC mak teknolójia ida, iha neebe ita kahur fibra makro polipropilenu ho betaun/massa simenti, hodi hadia forsa, durabilidade, no reziliénsia infraestrutura estrada nian,” dehan nia liu husi karta nee.
Projetu demonstrasaun nee hadia ona estrada kilómetru rua hosi estrada rurál ida rai-henek nian ba simentu ho fibra neebe dura liu, hodi fornese ba komunidade sira asesu ho diak liubba merkadu, eskola, servisu saúde, no servisu esensial sira seluk.
Harii iha susesu husi pilotu nee, Governu TL, liu husi MOP habelar ona implementasaun teknolójia FRC ba munisípiu 10 iha nasaun laran tomak hodi hametin konetividade rural no apoia dezenvolvimentu ekonómiku lokal.
“Atividade ida nee hanesan atividade pilotu ida hodi demonstra sistema ba uza fibra ho maneira ida atu bele kahur hamutuk ho material konstrusaun seluk hanesan simente, raihenek no krikil hodi bele fo kualidade ida forte durante de implementasaun. Ita mos sei uza sistema neebe hanesan iha area 10 iha teritoriu nasional ho orsamentu neebe governu iha,” dehan Ministro Samuel.
Embaixadora ba Australia iha TimorLeste, Caitlin Wilson hatete, Projetu demonstrasaun nee aliña ho planu estratéjiku dezenvolvimentu TL nian no prioridade sira husi IX Governu Konstitusional, neeb fó énfaze ba reabilitasaun rede estrada sira no envolvimentu kontrator lokal sira iha dezenvolvimentu infraestrutura rural.
“Governu Austrália sente orgullu parseria ho Governu TL hodi entrega estrada neebe reziliente ba klima. Liuhusi introduz teknolójia FRC, ita harii infraestrutura neebe dura garante asesu seguru no konfiável liu ba komunidade lokál sira maske durante kondisaun tempu neebe estremu,” dehan nia.
(dom)
