DILI, STLTIMORLESTE.com – Timor Leste (TL) ho Moçambique iha relasaun neebe exelente no forte tebes dezde uluk too mai ohin loron.
Kestaun nee hatoo husi Embaixador TL ba Moçambique, Luis Miguel Lopes de Sousa Sequeira ba jornalista sira, bainhira remata halo enkontru ho Prezidente Republika, Jose Ramos Horta iha Palasiu Prezidensial Nicolau Lobato, Bairo Pite, Segunda (06/07/2026).
Embaixador hatete, TL ho Moçambique nia relasaun forte tebes.
“Ita nia relasaun TL entre Moçambique exelente forte tebes depois de vizita sua exelensia Moçambique iha fulan Julhu 2024 hametin liu tan no reforsa liu tan ita nia relasaun, depois iha vizita sua exelensia nia mos ita asina memorandu entendimentu inklui mos ensinu superior siensia no teknolojia neebe tinan ida nee mos ita sei simu estudante nain 9 neebe mak sei ba estuda iha Moçambique, hau sente ita boot sira kala hatene tiha ona foin lalais semana kotuk fundu dezenvolvimentu kapital humanu fo sai tiha ona lista naran sira neebe atu ba eskola, grasa adeus sira nain 9 konsege hetan bolsa atu ba estuda iha neeba,” dehan Embaixador TL Ba Moçambique.
Embaixador hatete, daudaun nee asina akordu ida kona-ba minerasaun hidrocarboneto no rekursu naturais atu troka esperiensia entre nasaun rua, depois asina akordu nee sira husi Moçambique mai vizita ona Timor liu husi banku central Moçambique nomos supervizaun fundu soberanu Moçambique nian sira mai vizita Timor para atu aprende liu tan oinsa jestaun Timor nia ba iha fundu petrolíferu.
Embaixador TL ba Moçambique hatutan, durante nia mandatu programa neebe prioridade mak primeiru hametin relasaun entre nasaun rua nomos membru CPLP hotu.
“Primeiru mak hametin ita nia relasaun entre nasaun rua nomos membru CPLP hotu, tanba agora ita assume temporariu CPLP nia iha neeba hamutuk ho membru balun ita halo atividade barak, agora mos Timor organiza hela atu selebra loron CPLP iha fulan Maiu nee koordena ho Embaixada Portugal iha selebra dia da Portugues Kultura CPLP, agora dia CPLP iha fulan nee nia laran ami sei hein hela planu hamutuk atu halo hamutuk durante vizita sua exelensia Maria Jardim, Sekretaria ezekutiva CPLP nia neebe mak sei vizita ba Mocambique iha fulan Outubru nia laran,” dehan nia.
Aleinde nee Embaixador mos sei foku liu ba asina memorandum entendimentu asina ho Moçambique nunee bele kontinua implementa, tanba daudaun nee iha ona bolsu estudu neebe lao ona, no estudante nain 4 iha neeba daudaun nee remata ona estudu atu fila ona mai Timor Leste, maibe embaixador hakarak haruka tan estudante Timor oan ba estuda medisina iha neeba. Iha mos setor seluk neebe bele halo kooperasaun inklui mos turizmu.
“Foin lalais hau enkontru ho Ministru Ekonomia Moçambique, no Sekretariu Estadu Turizmu, iha enkontru nee ita halo akordu ida neebe ami manda tiha ona ba MNEK TL atu haree antes ita asina kontratu, iha area seluk hametin defeze, grasa a deus agora ita iha ona adidu defeza, sira mos hakarak oferese bolsa estudu ba ita nia kadetes balun membru F-FDTL atu ba estuda iha akademia militar nomos iha setor seluk tan,” dehan Embaixador.
Embaixador hatete, daudaun nee estudante neebe atu ba halao estudu iha Moçambique maioria iha area medisina hamutuk nain 9 husi feto nain 8 no mane nain 1, no tuir planu sira ba halo estudu iha area medisina mais iha faze negosiasaun hela ho Universidade entre fundu dezenvolvimentu humanu halo hela negosiasaun.
Nia hatete, defende mos ema nia kouta atu simu nain hira, tanba nee sei halo hela negosiasaun entre parte rua karik labele simu hotu ba medisina balun ba fali estuda iha fakuldade seluk.
Daudaun nee embaixador halao misaun tinan 2 fulan rua ona iha Mocambique, no premeiru vez mai halo vizita trabalhu iha Timor Leste.
Iha biban nee Prezidente Republika Jose Ramos Horta hatoo benvindu ba Embaixador Timor Leste ba Mocambique, Luis Miguel Lopes de Sousa Sequeira mai iha Palasiu Prezidensial hodi halo enkontru ho Prezidente Republika, Prezidente mos husu kontinua halao servisu ho dignu nunee bele tane Timor Leste nia naran iha Mocambique no kontinua hametin liu tan relasaun rai rua iha futuru.
(eme)
