DILI, STLTIMORLESTE.com – Akademista sira preokupa Timor-Leste (TL) nakonu ho sidadaun estranjeiru hamutuk 282.304, ne’ebé tama ho vistu turista durante Janeiru to’o Agostu 2026.
Preokupasaun ne’e hato’o husi Akademista UNTL, Antonio da Silva relasiona ho deklarasaun ne’ebé hato’o husi Diretór Ezekutivu Servisu Imigrasaun, Komisáriu Asistente Polísia Jorge Monteiro kona-ba totál sidadaun estranjeiru ne’ebé tama iha territóriu Timor-Leste.
Tuir dadus ofisiál husi Diresaun Jerál Servisu Migrasaun, movimentu tama estranjeiru hamutuk 282.304 ne’e rejista hahú fulan Janeiru to’o Agostu tinan ne’e, maioria uza vistu turista.
Akademista ne’e konsidera númeru ne’e boot tebes ba nasaun ki’ik hanesan Timor-Leste, no presiza hetan atensaun seriu husi Governu.
“Timor-Leste nakonu duni ho estranjeiru. Ita ko’alia kuaze rihun atus tolu tama iha fulan ualu nia laran. Ne’e númeru ne’ebé boot tebes,” dehan Antonio ba STL, Kaikoli, Dili, Segunda (21/09/2026).
Nia hatutan katak, Governu labele nonok ba situasaun ne’e no husu Servisu Imigrasaun atu servisu hamutuk ho SEFOPE no Servisu Komérsiu hodi halo fiskalizasaun rigorozu, atu evita abuzu vistu turista ba atividade negósiu no servisu ilegál ne’ebé bele foti kampu serbisu timoroan nian.
Iha parte ketak, Observadór Polítika, Manuel de Araujo hatete, Governu tenke haree asuntu ne’e ho seriu, tanba bele fó ameasa ba seguransa nasionál no estabilidade sosiál.
“Estranjeiru barak tama ho vistu turista ne’e risku boot. Balun bele lori droga, balun halo servisu ilegál. Estadu tenke kontrola. Se lae, ita mak sai minoria iha ita-nia rain rasik,” dehan Manuel.
Manuel husu Ministériu Interiór atu atualiza sistema baze de dadus no halo operasaun konjunta iha Dili laran, hodi identifika sira ne’ebé abuzu vistu turista no foti medida tuir lei ne’ebé vigora.
Entretantu tuir regulamentu husi Diresaun Jerál Servisu Migrasaun Timor-Leste, sidadaun estranjeiru ne’ebé tama ho vistu turista la autoriza atu hala’o atividade profisionál, negósiu, ka serbisu ho kontratu.
Se Polísia ka autoridade Migrasaun kaptura sidadaun estranjeiru ne’ebé abuzu vistu turista hodi serbisu, sira sei hetan sansaun administrativu hanesan koima ka multa no bele hetan deportasaun tuir lei migrasaun ne’ebé vigora.
(car)
