DILI, STLTIMORLESTE.com – Prezidente Repúblika (PR), José Ramos-Horta halo enkontru ho Embaixadór Maroko iha Indonézia, Redouane Houssaini, diskute hametin relasaun bilaterál entre Timor-Leste (TL) no Maroko liuhusi kooperasaun konkreta iha área polítika, ekonomia, edukasaun no juventude.
Bainhira remata hasoru malu, Embaixadór Maroko iha Indonézia, Redouane Houssaini ba jornalista sira iha Palásiu Prezidensiál Nicolau Lobato, Bairo Pite, Dili, Kinta loraik (17/09/2026).
Embaixadór Maroko fó parabéns ba Prezidente José Ramos-Horta kona-ba viajen Timor-Leste nian husi luta ba independénsia, konsolidasaun instituisaun demokrátika no adezaun ba ASEAN.
“Ohin mai halo enkontru ho Sua Exelénsia, Prezidente Repúblika Demokrátika Timor-Leste, ha’u hakarak fó parabéns ba nia kona-ba viajen husi Timor-Leste nia luta ba ninia independénsia, ba konsolidasaun ninia instituisaun demokrátika sira no ba nia adezaun ba ASEAN iha tinan kotuk, iha Outubru,” hatete Redouane Houssaini.
Nia hatete, iha enkontru ne’e sira diskute kona-ba importánsia Timor-Leste nu’udar membru ASEAN, no konsidera Timor-Leste nu’udar parseiru importante iha rejiaun Sudeste Aziátiku.
Embaixadór ne’e mós hatete katak Maroko prontu atu fó apoiu tomak ba Timor-Leste, liuliu atu dezenvolve relasaun entre Maroko, Áfrika no Sudeste Aziátiku liuhusi Timor-Leste nu’udar ponte.
“Ita haree Timor-Leste hanesan parseiru iha rejiaun ida-ne’e no sei sai hanesan ponte ida entre Maroko, Áfrika, Sudeste Aziátiku no ASEAN. Ami espresa ami nia apoiu tomak ba Timor-Leste,” hatete nia.
Relasaun Bilaterál Bazeia ba Konfiansa no Interese Mútuo, Redouane Houssaini hatete katak, Timor-Leste no Maroko konkorda atu hahú faze foun iha relasaun bilaterál, bazeia ba kooperasaun konkreta, konfiansa polítika no interese mútuo entre nasaun rua.
Nia esplika katak, kooperasaun ne’e bele dezenvolve iha nível polítika, ekonomia, edukasaun no juventude.
“Ita konkorda ona katak, to’o tempu atu hahú faze foun iha ita-nia relasaun bilaterál, bazeia ba kooperasaun konkreta, konfiansa polítika no interese mútuo ba nasaun rua ne’e,” hatete Embaixadór Maroko.
Nia hatete, Maroko no Timor-Leste sei kontinua diálogu liuhusi kanál diplomátiku sira hodi transforma amizade no relasaun bilaterál ba kooperasaun ne’ebé bele fó benefísiu ba nasaun rua iha futuru.
Embaixadór katak nasaun sira hosi Globál Súl dezenvolve ona esperiénsia ne’ebé iha valór iha área barak, no agora tempu ona atu fahe esperiénsia entre nasaun sira sein impoin modelu hosi li’ur.
“Ami konkorda ona katak nasaun sira hosi Globál Súl dezenvolve ona esperiénsia ne’ebé iha valór iha área barak. To’o ona tempu ba nasaun sira-ne’e atu fahe sira nia esperiénsia entre sira, sein impoin modelu ruma hosi li’ur,” hatete Redouane Houssaini.
Nia hatete katak, Maroko dezenvolve ona esperiénsia konsiderável iha área agrikultura, ambiente, peskas, floresta no enerjia renovável, ne’ebé bele sai oportunidade ba kooperasaun entre nasaun rua.
Embaixadór Maroko hatete katak, sira diskute ona posibilidade atu foti inisiativa kooperasaun konkreta entre Timor-Leste no Maroko iha tinan hirak oin mai.
(eme)
