DILI, STLTIMORLESTE.com – Visi Primeiru Ministru, Ministru Koordenador Asuntu Sosial, Ministru dezenvolvimentu Rural no Abitasaun Komunitaria, Mariano Assanami Sabino, halao enkontru ho Reprezentante Embaixador Vietname iha Timor Leste (TL), Pham Binh Dam, hodi diskute kooperasan Bilateral nasaun rua nee iha area Dezenvolvimentu Rural, Sosial no Edukasaun.
Tuir Reprezentante Embaixador Vietname ba TL, Pham Binh Dam, hafoin halao enkontru ho II Vise Primeiru Ministru Maariano Asanami Sabino iha Palasiu Governu, Segunda nee (20/07/2026), ohin mai Palasiu Governu halao enkontru ida neebe produtivu tebes ho II Visi Primeiru Ministru.
Sorumutu ohin akontese hafoin Vietname estabelese ona Rezidensia embaixada iha TL no agora TL mos sai ona membru ASEAN no Primeiru Ministru (PM), Kay Rala Xanana Gusmao iha ninia vizita iha Vietname, lori rezultadu diak no susesu boot ba membru Delegasaun sira husi TL.
“Iha enkontru ohin nee ho II Visi Primeiru Ministru, Mariano Assanami Sabino, ami koalia kona ba area sira neebe hloa parte iha serponsabilidade papel II Visi Primeiru Ministru nian, liu-liu area sosial, Dezenvolvimentu Rural nomos Edukasaun neebe estabelese ona asina akoordu kooperasaun,” dehan Embaixador Vietname ba Timor Leste, Pham Binh Dam iha Palasiu Governu.
Lider Diplomata Vietname ba TL akresenta, Vietname iha esperiensia no matenek barak iha area sira nee, tanba nee Governu Vietname prontu atu fahe esperensia no kohesimentu hirak nee ba ho TL.
Iha biban nee Embaixador Vietname, Pham Binh Dam dehan, knaar embaixador nian mak atu identifika prioridade sira, projetu potensial sira no asaun sira neebe nasaun rua nee bele kolabora hamutuk ba benefisiu povu no estadu.
“Hau hanoin, inisiativa kooperasaun servisu hamutuk nee, atu haree liu ba Dezenvolvimentu Agrikultura, Peskas, Rekursu Maritimu no ekonomia Azul mak area sira neebe potensial boot tebes entra nasaun TL ho Vietname, tanba nee ohin lokraik, hau sei partisipa iha serimonia lansamentu ba ro ida neebe harii husi Emprezariu Vietname, ro nee sei opera iha tasi ba atividades Peskas nian, sai ezemplu ida neebe bele konvida investimentu sira husi Vietname mai investe iha setor Agrikultura, Peskas iha TL,” dehan nia.
Iha biban nee, nia akresenta, liu husi sorumutu ohin, estabelese mos kooperasaun iha area edukasaun, nuudar area importante atu bele dezenvolve hamutuk.
“Iha Vizita Primeiru Ministru Kay Rala Xanana Gusmao ba vietname, ita asina ona memorandum nota entendimentu (MoU) kona ba edukasaun no agora tempu ona atu implementa akordu nee. Ami bele fo apoiu formasaun iha rekursu umanu iha area sira neebe TL Presiza. Ami hein katak, projetu no programa konkretu hirak nee, bele implementa lalais, atu fo rezultadu pratiku no benefisiu ba nasaun rua, Vietnam-TL,” dehan Embaixador Pham Binh Dam.
Iha biban nee, Cristopher Hendry Samson dehan, enkontru ohin II Visi Primeiru Ministru, Ministru Koordenador Asuntu Sosial, Ministru dezenvolvimentu Rural no Abitasaun Komunitaria, Mariano Assanami Sabino, halao enkontru ho Reprezentante Embaixador Vietname iha Timor Leste (TL), Pham Binh Dam lao diak tebes.
(jos)
