COVALIMA, STLTIMORLESTE.com – Asosiasaun Jornalista Uniaun Press Timor-Leste (TLPU) fahe koñesimentu litérasia dijitál ba estudante EBC Dais, iha Munisipiu Covalima, iha ne’ebé entrega mós ekipamentu desportu ba eskola rua ne’e.
Atividade ne’e hala’o Segunda-feira (05/10/2026), liuhusi programa Media Tour, nu’udar parte husi preparasaun komemorasaun Loron Liberdade Imprensa no Loron Balibo Five, ne’ebé sei selebra iha 16 Outubru 2026.
Prezidente TLPU, Candido Alves,l hateten katak, atividade ne’e nia objetivu mak aumenta koñesimentu estudante sira kona-ba litérasia dijitál, liberdade imprensa no papél jornalista iha sosiedade.
Nia esplika katak, utilizasaun media sosial iha impaktu positivu no negativu. Tanba ne’e, estudante sira presiza hatene uza teknolojia ho responsabilidade no hanoin kritiku.
“Wainhira akompaña informasaun iha media sosial, tenki haree ho didi’ak husi media konvensionál sira. Labele rona de’it, maibé tenki verifika didi’ak,” Candido Alves esplika ba estudante sira, Segunda (05/10/2026).
Nia husu estudante sira atu verifika fonte informasaun, haree data publikasaun no kompara notísia ho fonte seluk antes fahe ba ema seluk.
Litérasia dijitál inklui kapasidade atu buka, avalia, analiza, produz no fahe informasaun ho maneira seguru, responsavel no étika, la’ós de’it hatene uza telemóvel ka komputadór.
Estudante sira mós presiza uza media sosial atu apoia aprendizajen, buka matéria edukativa no video aula, proteje dadus pesoál, no evita insultu, bullying, ameasa ka diskriminasaun iha ambiente dijitál.
Candido Alves mós esplika kona-ba responsabilidade jornalista nian, ne’ebé inklui buka, verifika, analiza no hato’o informasaun bazeia ba faktu ba públiku.
“Jornalista nia responsabilidade la’ós de’it hakerek notísia, maibé mós tenke garante katak informasaun ne’ebé hato’o ba públiku mak loos, independente, justu no bazeia ba faktu.”
Adjuntu Diretór EBC Dais, Santiago do Nascimento Amaral, hato’o agradese ba TLPU tanba fahe koñesimentu importante ne’e ba estudante no profesór sira.
Nia konsidera litérasia dijitál importante iha era teknolojia, atu estudante sira bele distingue informasaun kredível husi informasaun ne’ebé la loos, no uza media sosial ho responsabilidade.
“Ami hatene oituan, maibé presiza hatene liután, oinsá uza media sosial tuir impaktu positivu, no labele viola lei ka privasidade,” nia hato’o
Programa ne’e mós aborda liberdade imprensa, liberdade espresaun, servisu jornalista no utilizasaun responsavel media sosial, nu’udar parte husi edukasaun estudante sira kona-ba informasaun iha era dijitál.
Apoiu Ekipamentu Desportu
Iha atividade hanesan, Prezidente TLPU, Candido Alves, entrega apoiu ekipamentu desportu, inklui uniforme desportu, ba representante EBC Dais.
Nia husu estudante sira atu utiliza ekipamentu ne’e hodi apoia atividade desportiva no dezenvolve sira-nia abilidade.
Responsavel EBC Dais hato’o agradese ba TLPU nia inisiativa ne’ebé kontribui ba dezenvolvimentu koñesimentu dijitál no atividade desportiva estudante sira nian.
(tom)
