DILI, STLTIMORLESTE.com – Relasiona ho loron nasional Liberdade Imprensa neebe mak sei realiza iha loron 16 Outubru tinan nee, Timor Leste Press Union (TLPU) husu jornalista sira atu mantein profisional.
Sekretariu Jeral TLPU, Zezito da Silva hatete, TLPU hakarak parabeniza ba jornalista tomak, tanba loron ida nee selebra loron nasional Liberdade Imprensa neebe mak Conselho Imprensa (CI) realiza iha Balibo.
“Ba jornalista hotu, ita hatene katak loron nasional Liberdade Imprensa ita tenke halo servisu profisional no kualidade hodi atende publiku liu husi informasaun,” dehan nia ba STL iha Farol, Dili, Tersa (15/10/2024).
Nia dehan, loron nasional Liberdade Imprensa fo hanoin katak, presiza halo reflesaun ba situasaun hotu-hotu ba iha media ida pasadu nian no media ida agora nian.
Nia dehan, loron ida mos atu hanoin sakrifisiu jornalista sira halo antes iha kolonializasaun iha tempu Indonezia.
“Agora ita haree oinsa atu projeta ba futuru, sakrifisiu lubuk ida neebe jornalista sira hasoru ka dedikasaun neebe sira halo, prosesu ida ba libertasaun patria sira enfrenta hela problema lubuk ida, jornalista balu too mate,” katak nia.
Nia mos husu ba kualker politiku nomos kualker entidades relevante atu labele interven atividade jornalista sira nian, tanba jornalista mak sai nuudar ponte informasaun hodi hatutan lian laek sira nia lian ba makaer ukun sira.
(mar)
