BAUCAU, STLTIMORLESTE.com – Timor-Leste liu ona tinan 24 ukun-an no forma ona Governu to’o dasia, maibé komunidade iha Suku Libagua, Postu Administrativu Laga, Munisípiu Baucau, uma kain 30 resin sei uza nafatin lampuriña iha tempu kalan.
Xefe Suku Libagua, Francisco de C. Gama hateten, Suku Libagua kompostu husi aldeia lima, mak Aldeia Buibata, Larimuta, Larifano ka Larino, Libagua no Tirilolo.
Suku ne’e iha populasaun hamutuk 2.153 ema, ho total uma kain 484. Husi númeru uma kain ne’e, uma kain 30 resin seidauk asesu eletrisidade tanba sira hela dook husi liña eletrisidade ne’ebé eziste iha Suku Libagua.
Nia hateten, atualmente komunidade uma kain 95% asesu ona eletrisidade, maibé 5% sei hela seidauk asesu no obriga komunidade sira uza lampuriña iha tempu kalan hodi hetan naroman.
“Ita konta iha aldeia lima, kada aldeia balu seidauk asesu eletrisidade tanba dook husi liña eletrisidade. 95% asesu ona eletrisidade, 5% seidauk asesu eletrisidade. Bainhira kalan, sira sunu lampuriña,” Francisco hateten ba STL iha Libagua Laga, Sesta (12/09/2026)
Francisco hateten, kestaun refere ekipa EDTL antes prezensa ona iha Suku Libagua atu halo levantamentu no foti dadus kona-ba uma kain sira ne’ebé seidauk asesu eletrisidade.
Dadus ne’e, tuir nia, Autoridade Suku hato’o ona ba autoridade nasionál atu bele konsidera iha prosesu eletrifikasaun.
Maibé, to’o agora, komunidade sei hein tanba rezultadu husi levantamentu ne’e seidauk iha.
“Ha’u hanesan Autoridade Suku, momentu ekipa EDTL to’o mai iha Suku, sira foti ona dadus uma kain sira ne’ebé seidauk asesu eletrisidade no ami hato’o ona ba nasionál. Maibé to’o agora ami hein, seidauk iha rezultadu,” nia hateten.
Xefe Suku Libagua subliña katak, komunidade sira la’ós husu atu simu painel solar, maibé hakarak asesu ba liña eletrisidade permanente atu garante fornesimentu eletrisidade.
“Ida ne’e la’ós atu distribui painel solar, maibé ha’u hanoin atu halo instalasaun liña eletrisidade. Ha’u husu atu aselera prosesu ne’e,” Francisco de C. Gama hateten.
Alénde problema asesu eletrisidade, komunidade Suku Libagua mos enfrenta problema infraestrutura estrada, liuliu estrada husi estrada Munisípal Diresaun Laga-Baguia husi Suku Nunira ba Aldeia Larimuta, Buimata no Tirilolo, atual kondisaun aat no sai obstákulu ba movimentu transporte, liuliu iha tempu udan.
“Estrada husi estrada boot Suku Nunira to’o mai Aldeia Larimuta nia kondisaun aat, difikulta transporte movimentu ba mai. Husi estrada boot to’o mai Aldeia Larimuta, Buimata, Tirilolo, kilometru lima resin,” nia esplika.
Tuir nia, Autoridade Suku hato’o ona pedidu ba Ministériu Obras Públikas atu haree no trata problema estrada refere, iha ne’ebé liuhusi kompanhia Timor Progres halo ona levantamentu iha área, maibé to’o agora seidauk iha rezultadu.
“Ha’u hanoin pedidu sira iha hotu ona gabinete nia liman. Kompaña Timor Progres mai halo ona levantamentu, maibé to’o agora ami hein, rezultadu seidauk iha,” nia hateten
(tom)
