BAUKAU, STLTIMORLESTE.com – Komando Polisia Munisipiu liu husi Seksaun Tranzitu Baukau, sei ba direita iha eskola sira hodi buka no identifika estudante minoridade neebe uza motor.
Diresaun Tranzitu Seguransa Rodaviariu Nasional deklara ona ba publiku atu halo operasaun ba eskola sira husi ensinu baziku terseiru siklu no sekundaria sira iha kapital Dili hodi identika estudante neebe utiliza motorizada ba eskola, tanba balun laiha karta konduzaun.
Nunee Komadante Interinu Komando Polisia Munisipiu Baukau, Superintendente João Sancho Pires hateten, ba asuntu refere, Komando Polisia Munisipiu Baukau seidauk simu ordem Komando Jeral, maibe sei kobre eskola sira hodi idetifika estudante minoridade neebe utiliza motorizada.
“Seidauk iha karta ruma husi Komando, maibe ita mos hakarak halo, semana kotuk hau orienta ona Xefe Tranzitu tempu badak sei ba eskola sira iha Baukau atu cek motor sira neebe mak minoridade sira lori,” hateten João Sancho Pires ba jornalista sira iha Vila Nova, Baukau, Tersa (15/04/2025).
Nia esplika, tuir lei kodigu estrada sidadaun neebe laiha karta konduzaun inklui minoridade la autoriza atu konduz motor no kareta, maibe daudaun akontese, estudante minoridade barak mak utiliza motor, liu-liu ba asuntu eskola.
Nunee planu atu kobre eskola sira hodi identifika estudante minoridade sira neebe konduz motor, parte Tranzitu sei prende hodi aplika koima no haruka estudante neebe idade too ona ba rejistu iha Diresaun Nasional Transporte Terrestre (DNTT) trata karta konduzaun no idade neebe seidauk too la autoriza kontinua utiliza motor.
“Inan aman mak konsente oan sira, lo-loos inan aman labele sosa motor fo ba oan menoridade sira atu utiliza, tanba asidente barak liu nee husi labarik minoridade no balun laiha karta konduzaun,” João Sancho Pires argumentu.
Komandante interinu nee sublina, kauza estudunte minoridade neebe utiliza motor ba eskola, konsente husi inan aman, maibe tuir lei minoridade uza motor bandu, tanba kazu asidente neebe kontinua rejistu, maioria involve husi motorista neebe laiha karta konduzaun inklui minoridade sira, tanba laiha konhesimentu kona-ba sinais Tranzitu.
Entretantu planu Komando Polisia Munisipiu Baukau liu husi seksaun Tranzitu kobre eskola sira hodi identifika estudante minoridade utiliza motor, sei hahu bainhira prosesu aprendizajem ba segundu trimestral anu letivu 2025.
(tom)
