DÍLI, STLTIMORLESTE.com — FC Villa Ave Maria sai kampeáun Copa ISDB 2026, no treinador Omes promete kontinua hadi’a prestasaun ekipa iha kompetisaun sira tuir mai.
Omes hato’o agradese ba komisaun organizadora tanba konsege organiza Copa Instituto Superior Dom Bosco (ISDB) 2026 ho diak.
Nia mos agradese ba Maromak tanba fó oportunidade ba FC Villa Ave Maria tama final no sai kampeáun.
Omes hateten lia hirak nee ba jornalista STL iha Kampu Futebol Dom Bosco, Comoro, Dili, Sesta-feira (18/09/2026), depois de manan FC Mãe da Graça.
“Hau agradese ba komisaun tanba bele organiza Copa ISDB ho diak. Hau mos agradese ba Maromak tanba lori ami to’o final no sai vensedor,” nia agradese.
Depois de sai kampeáun, Omes hateten katak sei kontinua promove no dezenvolve ekipa, liuliu hadi’a kapasidade no performa jogadór sira.
“Hau sei nafatin promove ekipa no kontinua hadia sira nia performa, para iha jogu sira tuir mai bele hatudu jogu ne’ebé diak liu,” nia promete.
Iha parte seluk, kapitaun FC Mãe da Graça, Leo Gomes hateten katak, nia orgullu ba esforsu ekipa durante kompetisaun, maski la hetan rezultadu ne’ebé hakarak.
Leo Gomes esplika katak, iha parte ikus jogu, ekipa komesa lakon stamina, ne’ebé fó oportunidade ba FC Villa Ave Maria atu hatama golu.
“Hau senti orgullu tebes tanba ami halo esforsu ikus. Maibé ami lakon stamina, tanba ne’e adversáriu konsege hatama golu,” nia orgullu.
Leo Gomes mos promete katak ekipa sei kontinua treinamentu no hadi’a aspetu tékniku, atu bele kompete diak liu iha edisaun tuir mai.
“Ami sei esforsu nafatin atu treinu no hadi’a tékniku, atu iha futuru ami bele kompete diak liu tan,” dehan nia.
Iha Copa ISDB 2026, FC Villa Ave Maria sai kampeáun, FC Mãe da Graça segundu lugar, no FC Humbuti okupa pozisaun terseiru.
(leo)
