DILI, STLTIMORLESTE.com – Tribunal Judisial Primeira Instansia Dili (TJPID) iha loron Tersa (28/04/2026) halo adiamentu ba kazu Eis Prezidente Parlamentu Nasional(PPN) inisial ANdJdCA inklui arguidu nain tolu ho inisial AVdC, AAdJ no GdSMN.
Iha sala julgamentu laran, Prokurador Prosesu Domingos Gouveia deklara katak, prosesu nee inisiu Prokurador Aderito Tilman mak.kaer, depois koloka fali ba iha Prokurador João Marques, maibe Prokurador João Marques sei iha relasaun familia ho arguidu nain ida ba iha prosesu nee, tanba nee mak prosesu nee koloka fali ba iha Prokurador Domingos Gouveia.
Prokurador deklara, nia parte foin simu prosesu, tanba nee husu Tribunal atu fo prazu hodi halo konsultasaun ba iha autus.
Konaba Prokurador nia pedidu, Defeza João de Carvalho konsidera katak, pertinente tebes Prokurador atu haree autus, tanba sira mak hanesan nain ba iha prosesu.
Rona tiha Prokurador prosesu no Defensor Publiku João de Carvalho, Juiz prosesu Ana Paula deklara katak, pertinente tebes ba iha Ministeriu Publiku atu konsulta ba autus neebe iha, tanba nee Tribunal fo prazu loron 10 ba iha Prokurador prosesu hodi konsulta ba autus.
Juiz prosesu deklara tan, ba prosesu ida nee Tribunal la konsege halao julgamentu, tanba la prienxe koletivu Juiz Adjuntu nain ida tuir hela formasaun iha Malazia.
Ho ida nee, Juiz prosesu deside adia prosesu nee ba iha loron 8 fulan Junhu tinan 2027, hodi halao julgamentu.
Prosesu nee tama iha Tribunal, ligasaun ho tratamentu eis PPN iha Singapura Bali.
Tanba nee Ministeriu Publiku akuza arguidu sira hanesan ko autor material ba krime Abuju Poder previstu iha artigu 297 husi Kodigu Penal.
Prosesu adiamentu nee prezide husi Juiz prosesu Ana Paula, Ministeriu Publiku reprezenta husi Prokurador Domingos Gouveia Leite.
(ter)
