DILI, STLTIMORLESTE.com – Tribunal Judisial Primeira Instansia Dili julga arguidu AdCP hanesan aman, neebe komete krime hasoru lezadu inisial JdCP hanesan oan.
Iha indisus katak, loron 30 fulan Dezembru 2024, akontese ofedidu foti sasan iha loja Xineza, tanba nee mak halo arguidu kaer mangera ida baku iha ofendidu nia liman ain halo moras.
Sente moras ofendidu halai ba iha Polisia ida nia uma.
Konsekuensia husi arguidu nia hahalok nee, halo lezadu sente tauk hodi ba hato keixa.
Hatan ba akuzasaun nee arguidu deklara katak, faktus neebe konsta iha akuzasaun loos hotu kedan, arguidu halo duni aktu refere.
Arguidu deklara, momentu neebe arguidu ajuda hela nia kolega ida halo uma, oras to atu tama servisu, arguidu rona ofendidu nia kolega sira dehan ba arguidu katak, ofendidu foti tinta fuuk iha china nia loja.
Arguidu deklara, rona ida nee halo arguidu sente moe, hodi foti mangera baku iha ofendidu nia liman loos dala ida, foin atu baku tan sorin ofendidu tauk hodi halai husi sira nia uma, ba fali iha Polisia ida nia uma, no Polisia nee nia familia telefone ba iha Polisia nee mai lori ofendidu hodi ba hato keixa.
Arguidu deklara antes nee labaku ofendidu, maibe ida nee foin akontese ba dala uluk tanba nervoju, ho intensaun baku ofendidu atu loron seluk ofendidu labele halo tan hanesan nee. Arguidu arepende ona ba nia hahalok nee, promete ba iha Tribunal atu la halo tan aktu refere iha futuru.
Arguidu mos deklara, hahu husi akontesementu nee to mai agora, ofendidu la pratika tan hahalok nee.
Aleinde nee ofendidu deklara katak, momentu neeba ofendidu ho nia kolega Miguel ba foti tinta pinta fuuk iha loja China.
Ofendidu deklara, sira foti tiha tinta, ikus mai ofendidu nia kolega ida naran Eza maka kesar ba iha ofendidu nia aman, ho nunee maka ofendidu nia aman nervoju hodi lori mangera baku ba iha ofendidu nia liman.
Ofendidu deklara tan, hahu husi akontesementu to mai agora, ofendidu la halo tan krime refere.
Aleinde nee, sasin Felismina Soares deklara katak, sasin hanesan inan ba iha ofendidu, no arguidu hanesan sasin nia kaben.
Sasin deklara, momentu neeba arguidu uza mangera maka baku ofendidu, no baku dala ida kona iha liman. No sasin maka kose mina ba ofendidu nia liman neebe moras.
Rona tiha arguidu no ofendidu, Tribunal husu ba iha Ministeriu Publiku no parte defeza, atu tama ba iha alegasaun.
Iha alegasaun nee Prokurador deklara katak, arguidu konfesa ba faktus neebe iha, atu evita iha futuru arguidu labele halo tan aktu refere, husu ba iha Tribunal atu aplika pena suspensaun ba iha arguidu.
Enkuantu defeza arguidu nian, Fransisco deklara katak, arguidu baku ofendidu tanba foti sasan iha loja, maibe arguidu arepende ona ba nia hahalok nee.
Defeza konsidera, arguidu kolabora ho justisa, tanba nee husu Tribunal atu aplika pena neebe adekuadu ba iha arguidu.
Rona tiha alegasaun Tribunal kolektivu entende katak, arguidu ofendidu no mos sasin deklara katak, baku dala ida deit. Ho nunee Tribunal deside halo alterasaun kualifikasaun juridiku husi Krime Violensia Domestika ho Forma Maustratus ba Menor, ba fali iha krime Violensia Domestika ho Forma Ofensa Integridade Fisika Simples neebe previstu iha artigu 145 husi Kodigu Penal.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee, prezide husi Juiz Kolektivu, Jose Maria, Ana Paula, Ersilia de Jesus, Ministeriu Publiku Pedro Baptista, arguidu hetan asistensia legal husi Defensor Publiku Fransisco.
(ter)
