DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguida ho inisial ELdA hanesan profesora, neebe komete krime hasoru lezada MAS hanesan estudante.
Iha sala julgamentu laran, Juiz prosesu deklara katak, krime refere ho nia natureza semi publiku, lei fo dalan antes atu hakat ba iha julgamentu sei liu husi tentativa konsiliasaun.
Iha tentativa konsiliasaun nee, lezada idade menor tanba nee reprezenta husi nia aman Robianto Angdjaja deklara katak, perdua arguida nia hahalok nee, maibe husu atu iha futuru arguida labele halo tan aktu hanesan nee ba lezada, no ba estudante sira seluk.
Lezada nia aman deklara, maske nia ema Indonesia maibe hela kleur ona iha Timor, husu arguida atu halo tratamentu ba estudante sira hanesan, labele hare balu aman husi estranjeiru, nee la diak.
Lezada nia aman deklara, maske sente fuan moras ba arguida nia hahalok nee, maibe perdua ona husu atu iha futuru labele halo tan.
Rona tiha lezada nia aman, arguida hamrik hodi hamonu matan ben, deklara ba Tribunal katak, iha futuru nia sei la halo tan hahalok hanesan nee ba lezada, no ba estudante sira seluk.
Arguida arepende tebes nia aktu nee, konsidera nia aktu nee la diak. No arguida mos agradese ba lezada nia aman, tanba perdua ona arguida.
Rona tiha arguida, Ministeriu Publiku (MP) reprezenta husi Prokuradora Remizia de Fatima, husu arguida atu iha futuru labele halo tan aktu refere. MP mos husu atu Tribunal notifika desizaun homologa nian ba iha Ministeriu Solidariedade Sosial, atu ba oin kontinua halo akompanhamentu ba lezada iha nia estudu, hodi labele akontese tan krime.
Ikus mai MP husu Tribunal homologa prosesu nee, defeza la iha pozisaun. Nunee Juiz prosesu fo advertensia ba arguida katak, ida nee ikus ona ba oin labele pratika tan krime, konsidera estudante sira hanesan arguida nia oan. No Tribunal deside homologa prosesu nee, absolve arguida husi instansia.
Prosesu nee, prezide husi Juiz estajiadu nain ida, Ministeriu Publiku reprezenta husi Prokuradora Remizia de Fatima, no arguida hetan asistensia legal husi Defensor Publiku Jose da Silva.
Tuir faktus katak, iha loron 21 Setembru 2025, tuku 15:00, iha Eskola São Paulo VI, neebe lokaliza iha Suku Griserfor, Postu Administrativu Nain Feto, Munisipiu Dili, arguida iha nia knaar hanesan profesora, hanorin hela materia matematika.
Iha okaziaun nee, arguida haruka estudante balun ba oin atu responde pergunta sira, maibe maioria la hatene responde.
Tuir mai, arguida haruka estudante ida ho naran MAS (lezada) atu ba oin, maibe nia mos la konsege responde.
Iha loron 24 Setembru 2025, iha oras meudia, iha sala aula hanesan, durante atividade eskola, estudante sira halo barullu.
Arguida, la interven diretamente, maibe haruka xefe turma no nia vise atu baku estudante sira ho regua feru dobladu.
Tuir orden arguidu nian, xefe turma JAR baku dala ida iha liman loos lezada nian, hamosu moras boot.
Arguida mos hatudu nervozu no koalia ba lezada katak nia la bele hasai isin, ameasa atu baku fali se kontinua, neebe hamosu tauk iha estudante sira hotu.
Arguida, hanesan profesora, halo hahalok ida nee dala barak no kontinua, uza kastigu fisiku hanesan forma disiplina ba estudante sira.
Tanba faktu sira nee, lezada sente tauk no la komfortavel atu tuir aula ho arguida, no husu atu muda turma.
Tanba hahalok sira nee, lezada sofre moras iha liman, kotuk no iha liman-fuan indikator, no inklui mos trauma psikologiku.
Arguida halo ho forma direta, ho vontade livre no konsiente atu halo agresaun fisika no psikologika ba lezada, maski hatene katak hahalok nee kontra lei.
Arguida baku lezada ho regua feru dobladu, hamosu moras boot no ferimentu kiik iha liman-fuan, tuir relatoriu mediku iha prosesu. Arguida mos obriga lezada atu hakneak iha sala aula too aula remata tuku 17:00 OTL, hamosu sofrimentu fisiku no psikologiku.
Iha loron 23 Setembru 2025, tuku 17:30 OTL, iha eskola hanesan, arguidu haruka estudante sira hamriik no taka matan atu reza. Tanba estudante balun halo barullu, arguida nervozu no uza regua tolu neebe dobladu hamutuk atu baku iha kotuk estudante sira, inklui lezada.
Tanba nee, lezada sofre moras iha kotuk, liman loos too la bele foti liman durante loron ida, tuir prova medika iha autos.
Ho ida nee, arguidu hanesan autor material, iha forma konsumada, ho konkorsu real no forma repetida (kontinuada), krime ofensa ba integridade fisika simples, previstu no punidu tuir artigu 145 husi Kodigu Penal.
(ter)
