DILI, STLTIMORLESTE.com – Tribunal liberta imediata arguidu inisiál RC, tanba detensaun la kumpre rekezitu legal, depois hala’o primeiru interogatoriu judisiál iha Tribunal Judisiál Primeira Instánsia Dili.
Advogada privadu Elizabeth Rosa da Costa Lopes, ne’ebé reprezenta RC hatete, parte defeza konsidera detensaun ba nia kliente la legal tanba detensaun akontese li’ur husi flagrante delicto no laiha mandadu detensaun.
“Parte defeza invoka no aprezenta rekerimentu libertasaun imediata. Tribunal mos intende katak la prense rekezitu detensaun nian no detensaun la tuir prosedimentu legal,” dehan Elizabeth.
Nia hatete, Ministériu Públiku bele halo rekursu kona-ba desizaun tribunal, maibé parte defeza sei hein medida ne’ebé Ministériu Públiku sei foti.
RC enfrenta akuzasaun hosi Ministériu Públiku kona-ba krime burla agravadu. Audiénsia primeiru interogatoriu ne’e prezide hosi juíza singular Maria da Silva.
Arguidu hetan asisténsia hosi advogadu privadu Elizabeth Rosa da Costa Lopes no Jorge Sabas Victor, enkuantu Ministériu Públiku reprezenta hosi prokuradór Matias Soares.
Kazu ne’e relasiona ho alegasaun kona-ba Timoroan na’in 20 resin ne’ebé dehan sira sai vítima hosi promesa servisu iha Austrália. Vítima sira afirma katak sira selu osan administrativu atu hetan viza no servisu, maibé promesa ne’e seidauk realiza.
Suspeitu ho inisiál RC, ne’ebé vítima sira akuzadu nu’udar ema ne’ebé simu osan no organiza prosesu refere, kaptura hosi Diresaun Servisu Informasaun Polísia (DSIP), Polísia Nasionál Timor-Leste (PNTL), iha kasino área Timor Plaza, Dili.
Vítima Manuel Baptista afirma katak, iha 11 Setembru RC kontaktu nia no husu US$ 1.300 atu hahú prosesu servisu iha Austrália.
Tuir Manuel, nia no nia alin konsege halibur US$ 2.000 no entrega osan refere ba RC iha Timor Plaza. RC promete, tuir nia, katak viza sei sai iha 17 Setembru no sira sei viaja ba Austrália iha 23 Setembru.
Maibé, viajen ne’e la akontese iha data ne’ebá, nune’e vítima sira buka kontaktu ho RC atu husu kona-ba prosesu ne’ebé promete ona.
Iha 27 Setembru, vítima sira afirma katak sira hasoru RC iha tasi-ibun, no RC husu foto 3×4 no pasaporte. Tuir vítima sira, RC mós promete atu prepara roupa no xapeu ba viajen.
Depois ne’e, RC, tuir vítima sira, haruka mensajen husu deskulpa no promete atu fó fila osan iha 30 Setembru. Maibé, bainhira sira hasoru malu iha Timor Plaza, devolusaun osan adia tan ba semana tuir.mai.
Situasaun ne’e ikus mai hamosu diskusaun entre vítima sira no suspeitu, antes polísia intervén. Vítima sira afirma katak sira hato’o ona keixa ba Polísia Sientífika Investigasaun Kriminál (PSIK) atu husu autoridade investiga prosesu rekrutamentu no osan ne’ebé sira entrega.
(dom)
