DILI, STLTIMORLESTE.com – Atu redus kazu pendente sira neebe iha, oras nee daudaun Tribunal movel kontinua funsiona iha Tribunal Judisial Primeira Instansia Oecusse no Baucau.
“Fulan Marsu tinan ida nee, ami reativa fali Tribunal movel, ho Tribunal movel konsege halo redusaun ba prosesu pendente balu, maibe labele redus makaas tanba prosesu neebe tama kontinua makaas,” dehan Juiz Administrdor Tribunal Oecuse, Evanjelinho Belo ba STL foin lalais nee.
Nia hatutan, ezemplu fulan ida prosesu tama iha 40, sira redus bele too 30 maibe prosesu entrada kontinua aumenta. Maibe ba oin kontinua esforsu redus kazu pendente sira.
Iha fatin ketak, Juiza Adminstrador Tribunal Baucau, Maria Modesa dehan, julgamentu movel iha Baucau funsiona hela.
“Julgamentu movel funsiona hela, kuandu ba nee Juiz nain 3 mak ba, bele lori prosesu too 40, maibe Juiz ida mak iha fali Tribunal hodi haree prosesu sira hanesan Primeiru Interogatoriu sumariu,” dehan Juiza.
Fo ezemplu, hanesan servisu Tribunal movel kontinua lao atu redus kazu pendente, tanba prosesu krime pendente barak liu kompara ho prosesu sivil, no prosesu neebe tama barak liu iha Tribunal Baucau husi Munisipiu Viqueque.
Hatan kona-ba kondisaun edifisiu tribunal nian, Nia hatutan, edifisiu Tribunal nian kondisaun la dun diak ona tanba utiliza kedan hahu husi tempu uluk to agora, maibe husi Konselu deside ona atu halo edefisiu foun iha Tribunal Baucau, tanba nee Tribunal tuan nee hadia deit buat balu neebe aat, hodi hein edefisiu foun nian.
Aleinde nee, Jurista Sergio Dias Quintas dehan, Tribunal movel importante, lori justisa hakbesik ba komunidade sira.
“Tribunal movel nee importante, tanba fo benefisiu no bele azuda intervientes prosesuais la bele gasta tempu no osan barak hodi deskola ba sede Tribunal neebe dok husi sira nia Hela fatin,” dehan Sergio.
Nia hatutan, Tribunal movel nee nia objetivu maka hakbesik justisa ba povu liu-liu ba sira hirak neebe dok husi kapital nasaun, no munisipiu nebe la eziste sede Tribunal, entaun julgamentu movel nee nia finalidade lori justisa ba povu neebe kbiit laek hodi asegura sira nia direitu no dever nudar sidadaun.
Nia sublina, wainhira estadu seidauk implementa lei organizasaun judisiaria maka Tribunal movel nee kontinua realiza, tanba nia impaktu ba sidadaun neebe moris area rurais.
Haree husi parte seluk julgamentu movel ne parte ida hodi kontribui para bele reduz numeru kazu pendente, tanba wainhira intervientes prosesuais sira la konsege marka prenzensa iha sede Tribunal, julgamentu movel maka sai alternativu hodi rezolve kestaun nee.
(ter)
