DILI, STLTIMORLESTE.com – Tribunal Judisiál Primeira Instánsia Dili (TJPID) rona deklarasaun investigadora PNTL inisiál AdJ, iha julgamentu kazu obstrusaun ba autoridade públika.
Julgamentu ne’ebé kontinua iha Segunda-feira (12/10/2026) ne’e envolve arguidu inisiál LM, ne’ebé akuzadu halo violénsia hasoru investigadora Unidade Polísia Vulnerável (VPU), durante hala’o knaar.
Iha audiénsia ne’e, lezada AdJ esplika katak arguidu LM tuku nia ulun no tebe nia, ne’ebé halo nia monu ba rai durante insidente iha Komandu Munisípiu Dili.
Lezada afirma katak, nia sofre moras iha ulun no ain durante besik fulan ida, no la konsege tama servisu durante loron balu tanba kanek ne’ebé hetan.
Hafoin rona deklarasaun lezada nian, tribunál fó oportunidade ba Ministériu Públiku no defeza atu aprezenta sira-nia alegasaun finál.
Prokuradór Luís Hernani Rangel konsidera katak, faktu hotu iha akuzasaun provadu ona, nune’e husu tribunál atu kondena arguidu ho pena prizaun efetiva tinan 3 ho balun.
Enkuantu ne’e, defeza konsidera katak arguidu hatudu ona arrependimentu ba nia hahalok, nune’e husu tribunál atu konsidera sirkunstánsia hotu antes aplika pena ne’ebé justu.
Hafoin rona alegasaun parte rua nian, tribunál adia julgamentu ba loron seluk atu foti desizaun.
Lezada Esplika Insidente iha Komandu PNTL
Iha nia deklarasaun, lezada AdJ esplika katak insidente akontese bainhira membru PNTL sira lori arguidu LM ba nia fatin servisu iha Komandu Munisípiu Dili.
Tuir lezada, bainhira arguidu to’o iha komandu, nia husu autorizasaun atu uza sintina, no lezada permite nia atu ba.
Durante arguidu iha sintina, nia feen ho oan na’in rua to’o iha edifísiu PNTL. Lezada haree labarik sira hamriik ho ta’uk, nune’e nia hakuak sira atu fó konsolasaun.
Maibé, bainhira arguidu sai husi sintina, nia koko atu tuku nia oan sira. Lezada satan nia liman atu proteje labarik sira, maibé liman arguidu kona lezada nia ulun.
Lezada afirma katak arguidu kontinua tebe nia, ne’ebé halo nia monu ba rai. Maski monu ona, arguidu kontinua koko atu tebe, maibé nia konsege defende an.
Hafoin konsege hamriik, lezada halai sai husi edifísiu laran no subar iha sala ida, enkuantu membru PNTL seluk kaer arguidu no tau fali algema.
Lezada relata katak arguidu mós halo estragu ba ekipamentu iha edifísiu laran, inklui dudu komputadór, meza no baku odamatan ne’ebé halo husi kontraplaka.
Arguidu Nega Parte Husi Akuzasaun
Iha audiénsia anterior, arguidu LM admite tuku lezada dala ida de’it iha ulun parte karuk, la’ós dala rua, maibé nia admite tebe lezada dala rua.
Arguidu alega katak lezada hahú ko’alia liafuan ofensivu, inklui dehan nia merese ba Bekora, ne’ebé halo nia nervozu no tuku lezada.
Tuir arguidu, nia hahalok ne’e la’ós tanba lezada hakuak nia oan sira, maibé tanba liafuan ne’ebé lezada ko’alia ba nia.
Arguidu mós alega katak membru PNTL sira uza gás lacrimogéniu no rega ba nia matan, além de baku nia to’o nia oin nakles no raan.
Nia afirma katak, tanba kanek ne’ebé hetan, membru PNTL sira lori nia ba Ospitál Nasionál Guido Valadares (HNGV) atu simu tratamentu médiku.
Arguidu mós deklara katak, nia oan sira tauk no halai ba membru PNTL, tanba nia admite katak dala barak halo hahalok arbitráriu iha uma laran.
Akuzasaun Detalla Insidente
Tuir akuzasaun Ministériu Públiku nian, insidente akontese iha Segunda-feira (13/04/2026), besik tuku 10:00 dadeer, iha Komandu Munisípiu Dili, bainhira lezada hala’o knaar iha gabinete.
Iha momentu ne’ebá, membru PNTL husi Esquadra Komoro lori arguidu ba Unidade Polísia Vulnerável (VPU), atu halo investigasaun kona-ba kazu abuzu seksuál hasoru menór.
Akuzasaun refere katak, bainhira arguidu to’o iha komandu, lezada haruka nia atu tuur iha sala investigasaun, maibé arguidu hakilar no husu atu ba sintina.
Hafoin hetan autorizasaun, arguidu ba sintina. Bainhira nia sai, nia oan sira haree nia no tauk, nune’e hakuak metin lezada atu buka protesaun.
Tuir akuzasaun, arguidu koko atu tuku nia oan sira, maibé lezada satan nia liman. Arguidu depois tuku lezada dala rua iha ulun parte karuk.
Akuzasaun afirma katak, arguidu mós tebe lezada dala rua iha kelen, ne’ebé halo nia monu ba rai no sofre kanek, moras no bubu.
Depois insidente ne’e, arguidu kontinua halo estragu ba ekipamentu iha edifísiu laran, inklui komputadór no sasán seluk.
Ministériu Públiku konsidera katak, arguidu hala’o hahalok ne’e ho vontade livre no konsiénsia, maski hatene katak violénsia hasoru membru PNTL bele impede ezekusaun knaar profisionál.
Julgamentu ne’e prezide husi painél juízes kompostu husi José Escurial no Fransisca Cabral, ho prokuradór Luís Hernani Rangel reprezenta Ministériu Públiku.
Arguidu LM hetan asisténsia jurídika husi defensór públiku José da Silva.
(ter)
