DILI, STLTIMORLESTE.com – Komandante Polisia Nasional Timor-Leste (PNTL) Munisípiu Covalima, Superintendente Xefe Polisia Inacio Amaral informa, iha loron (25/04/2026) akontese udan boot iha Munisípiu Covalima neebe mosu insidente mota boot lori kazal ida iha Mota Karau-Ulun Suku Matai, Aldeia Quiar hodi halakon Mariana no Alcino nia vida.
“Akontese asidente ida neebe que ita la espera kauza husi udan boot mota tun no iha kazal nain ida feen Laen neebe fila husi toos atu ba fila uma, iha por volta tuku 14:00 loraik bainhira sira atu fila ba uma sira sei ultrapasa mota neebe hanaran Mota Karau Ulun iha Aldeia Quiar, Suku Matai, Postu administrativu Maucatar,” hatete Komandante Polísia Nasionál Timor-Leste (PNTL) Munisípiu Covalima, Superintendente Xefe Polisia Inacio Amaral ba jornalista iha Kuartel Jeral PNTL Caicoli, Dili, Tersa (20/04/2026).
Nia esplika, akontesimentu nee derepente deit tanba kazal nee hakat hela, mota derepente mota tun korrente boot hodi rezulta bee lori sira.
“Kazal nain rua nee mota lori kuaze metru hira ida, como familia balun haree, sira bolu komunidade tenta atu salva maibe la konsege, nia iis laiha ona no mate ona,” nia dehan.
Hatutan tan, iha momentu neeba ekipa husi Autoridade Protesaun Sivil PNTL no komunidade sira tenta buka Mariana nia kaben.
“Ami tenta buka nia laen maibe la konsege hetan, iha dia seguinte mak foin hetan fila- fali iha parte tasi nian tanba mota lori ona too iha tasi,” nia deklara.
Nia koalia, iha loron 25 nee bainhira ekipa hetan tiha Mariana nia isin mate; evakua kedas ba iha Ospital Referal Suai maibe la konsege salva nia vida tanba nia iis laiha kedas iha dalan.
“Ita konsege lori ba hospital, maibe too hospital ita labele salva tanba iis kotu kedas iha dalan i depois mate ita evakua kedas iha sira nia uma, i nane nee hetan depois loron tuir mai signifika dia 26 mak hetan por volta tuku 08:00 ho balun hetan fali iha tasi ibun, entaun ekipa konjunta bolu kedas ambulansia mate nian tula lori kedas ba nia residensia, neebe mate isin nee parese ohin sira hakoi tiha ona,” nia hatutan.
Entretantu matebian feto ho naran Mariana ho idade 50 anos no nia Kaben matebian Naran Alcino tinan 53.
Komandante PNTL Munisipiu Covalima, Superintendente Xefe Polisia husu ba komunidade sira atu nafatin tau atensaun no kuidadu aan iha area risku sira, bainhira atu ultrapasa mota tau atensaun hodi haree mota nia korente, no bainhira udan tur hakmatek labele ultrapassa atu nunee labele mosu insidente bee lori no lakon vida.
(jen)
