DILI, STLTIMORLESTE.com — Bankada FRETILIN husu Governu atu fó indemnizasaun ba uma kain 104 iha Kampung Alor, ne’ebé hetan eviksaun iha fulan Juñu no Jullu 2026, maibé to’o agora seidauk simu kompensasaun.
Deputada Bankada FRETILIN, Cristina Yuri Rebelo hatete katak, família sira-ne’e koopera ona ho Governu hodi apoia projetu dezenvolvimentu nasionál, inklui hodi fó rai ba Estadu.
Nia afirma, Governu iha responsabilidade atu garante direitu komunidade sira ne’ebé afetadu hosi eviksaun, liuliu bainhira rai ne’ebé sira hela ba ne’e uza ba interese públiku.
Tuir informasaun ne’ebé deputada ne’e aprezenta iha plenária Parlamentu Nasionál, uma kain 104 ho populasaun hamutuk ema 850, inklui labarik, inan-aman no ferik-katuas, hetan impaktu hosi eviksaun iha Suku Kampung Alor, Aldeia Hamahun, entre 23 Juñu no 3 Jullu 2026.
“Família sira relata katak iha promessa kona-ba pagamentu indemnizasaun iha prazu badak, maibé to’o agora seidauk simu sira-nia direitu,” Cristina Yuri Rebelo hatete iha plenária Parlamentu Nasionál, Tersa (29/09/2026).
Nia subliña katak, vítima sira la’ós de’it númeru estatístika, maibé família sira ne’ebé lakon hela-fatin no depende ba atividade ekonómika loroloron atu sustenta moris.
Cristina hatete, FRETILIN komprende Governu iha planu dezenvolvimentu no projetu infraestrutura ne’ebé presiza implementa, maibé prosesu ne’e tenke respeita direitu sidadaun sira.
“FRETILIN la kontra dezenvolvimentu. Maibé, dezenvolvimentu tenke lori povu ba oin, la’ós husik povu iha kotuk,” nia afirma.
Deputada ne’e husu Governu atu fó prazu klaru, informasaun transparente no komunikasaun regular ba família afetada sira, hodi evita sira hein indemnizasaun sein certeza.
“Hau husu Governu atu fó prazu klaru, informasaun transparente no komunikasaun regular, tanba família ne’ebé lakon uma la bele hein indefinitivamente,” nia dehan.
Iha resposta, Vise-Ministru Asuntu Parlamentár, Aderito Hugo, kompromete atu haruka preokupasaun deputada FRETILIN ne’e ba Ministériu Obras Públikas (MOP), hodi hetan atensaun no resposta husi entidade kompetente.
“Hau promete katak intervensaun deputadu sira-ne’e sei haruka ba membru Governu relevante sira, atu bele fó resposta ba preokupasaun ne’ebé hato’o,” Aderito Hugo hatete.
Antes ne’e, Ministru Obras Públikas, Samuel Marçal informa, Governu prepara orsamentu millaun US$2 iha 2026, hodi selu indemnizasaun ba família sira ne’ebé hetan eviksaun iha kapitál Dili.
Nia hatete katak, pagamentu ba família balu remata ona, maibé família seluk sei hein tanba problema administrativu, inklui abertura konta bankária no prosesu verifikasaun.
MOP espera atu realiza pagamentu ba família sira ne’ebé seidauk simu indemnizasaun iha semana tuirmai, inklui parte hosi uma kain 400 ne’ebé tama iha prosesu pagamentu.
(alb)
