DÍLI, STLTIMORLESTE.com – Uma-kain lima (5) iha Aldeia Lakenu, Suku Manelima, Manatuto, to’o agora seidauk asesu eletrisidade, maske komunidade sira hein tinan barak.
Preokupasaun ne’e hato’o husi Xefi Aldeia Lakenu, Flaviano Soares ba STL liu husi telefone iha Manatuto, Kinta (8/10/2026).
Nia hatete katak, uma-kain lima iha aldeia ne’e seidauk hetan asesu ba eletrisidade, no situasaun ne’e sai preokupasaun ba komunidade, tanba durante tinan barak sira hela iha nakukun.
“Hau nia aldeia iha uma-kain lima seidauk asesu ba ahi eletrisidade,” dehan Flaviano.
Nia lamenta katak, iha tempu ne’ebá komunidade iha área seluk ona hetan eletrisidade, maibé uma-kain lima iha Aldeia Lakenu sei hein hela asesu ba naroman.
“Iha ema barak ne’ebé hetan ona naroman, tanba sa ami komunidade nee tinan barak seidauk hetan naroman? Ami sei hela iha nakukun,” nia dehan.
Flaviano hatete, nu’udar autoridade lokal, sira dala barak ona halo proposta ba autoridade no ministériu relevante atu buka solusaun ba nesesidade komunidade nian, maibé to’o agora seidauk hetan resposta klaru.
Nia hatete, autoridade lokal, maske ho limitasaun, kontinua buka dalan atu hato’o komunidade nia preokupasaun, maibé realidade iha terenu sei nafatin hanesan, ho uma-kain lima seidauk asesu ba eletrisidade.
Tanba laiha eletrisidade, komunidade sira tenke uza lilin no mina rai ho lampu tradisionál hodi hetan naroman iha tempu kalan.
Situasaun ne’e mos afeta atividade diária família sira, inklui oan sira ne’ebé presiza naroman atu estuda iha kalan.
Aldeia Lakenu iha total 42 uma-kain, tánba nee husi total nee Uma kain 37 mak asesu ona, no uma-kain lima mak seidauk asesu ba eletrisidade.
Komunidade sira husu ba autoridade kompetente atu haree situasaun ne’e no buka solusaun atu uma-kain lima ne’e bele hetan asesu ba eletrisidade hanesan komunidade sira seluk.
(joa)
