DILI, STLTIMORLESTE.com – Uniaun Europeia iha Timor Leste (TL) apoiu finanseiru ho valor US$ 26.000 ba eventu Maratona Internasional Dili (MID) neebe sei halao iha loron 8 fulan Agostu tinan nee.
Maratona Internasional Dili 2026 neebe sei halao iha loron 8 fulan-agostu 2026, ho orgulhu rekonhese apoiu neebe fo husi Misaun Diplomatika Uniaun Europeia nian iha TL nuudar parseiru nivel osan mean prinsipal eventu nian, liu husi apoiu finanseiru ho valor US$ 26.000 ba eventu tinan ida-nee nian.
Tuir komunikadu neebe STL asesu husi media Prezidente Republika Segunda (20/07/2026) hatete eventu nee forma parte ida husi envolvimentu boot liu husi Uniaun Europeia ho Timor-Leste iha estratejia Global Gateway nia okos, neebe promove parseria sustentavel sira, dezenvolvimentu inkluzivu, no ligasaun neebe forte liu entre ema no komunidade sira.
Apoiu husi Uniaun Europeia reflete parseria neebe forte no pozitivu neebe sira kontinua harii ho Timor-Leste, bazeia ba valor komun sira konaba kooperasaun, moris-diak komunidade nian, inkluzaun, no dezenvolvimentu sustentavel.
Valor siranee liga ho natural ba espíritu Maratona Internasional Dili 2026 nian no mos ba tema tinan ida nee nian, “Hadomi Ita-nia Ai laran no Balada Fuik sira,” tanba eventu nee halibur ema hamutuk liu husi desportu, no iha tempu hanesan promove mos respeitu ba saude, ambiente, no komunidade.
Nuudar eventu prinsipal halai taru internasional nian iha Timor-Leste, maratona nee enkoraja estilu moris saudavel no ativu ba partisipante sira husi tinan no abilidade hotu-hotu, no mos hatudu ba mundu kona-ba nasaun nia enerjia, ospitalidade, no ambisaun.
Prezidente Republika Jose Ramos Horta hatete, Apoiu husi Uniaun Europeia laos deit ajuda haforsa eventu nee rasik, maibe haforsa mos mensajen luan liu katak desportu bele inspira unidade, reziliensia, no envolvimentu sosial neebe pozitivu.
“Ami hatoo ami-nia apresiasaun sinseru ba Misaun Diplomatika UE nian iha Timor-Leste ba sira nia lideransa no parseria iha Maratona Internasional Dili 2026. Sira nia envolvimentu nuudar parseiru Pakote Osan-Mean nian iha papel importante atu apoia kresimentu kontinua eventu nee nian nuudar plataforma ida ba kondisaun fízika, amizade, kooperasaun internasional, no orgulhu nasional,” katak Prezidente Republika.
Edisaun 2026 nee organiza husi Federação de Timor-Leste de Atletismo (FTA) sob patrosíniu husi Prezidente Jose Ramos-Horta no lori tema “Hadomi Ita-nia Ai laran no Animal Fuik sira.”
Programa eventu ba tinan ida nee inklui kategoria halai haat, Maratona Kompleta -42.195 km, Meia-Maratona – 21.1 km, Eventu Para Atleta sira – 10 km, Halai Ksolok (Fun Run) – 5 km.
Kompetisaun 2026 nian mos sei aprezenta melloria profisional oioin ba eventu nee, inklui teknolojia kronometrajen eletroniku MYLAPS, medisaun perikursu ho akreditasaun internasional, no foku neebe metin liu ba preparasaun atleta sira no aprezentasaun eventu.
Maratona Internasional Dili kontinua buras laos deit nuudar eventu desportivu, maibe mos nuudar plataforma nasional ida neebe halibur atleta de elite sira, halai nain rekreasional sira, parseiru dezenvolvimentu sira, patrosinador sira, media, voluntariu sira, no publiku em jeral. Apoiu husi parseiru komersial no institusional sira nafatin esensial atu garante katak eventu nee realiza ho profisional no asesível ba partisipante sira husi Timor-Leste no rai liur.
(eme)
