DILI, STLTIMORLESTE.com – United Nations Children Fund (UNICEF) konvida Prezidente Republika Jose Ramos Horta atu partisipa loron mundial labarik neebe monu iha 20 Novembru.
Bainhira remata halo enkontru, Country Reprezentativu UNICEF TL Patrizia di Giovanni ba jornalista sira iha Palasiu Prezidensial Bairo Pite, Tersa (19/11/2024) hatete, ohin mai konvida Prezidente Republika atu bele partisipa iha selebrasaun ba loron labarik nia neebe mak sei realiza iha Timor Plaza.
“Mai enkontru ho sua Excelência Prezidente Republika para atu konvida nia ba asiste loron mundial labarik nia neebe mak monu iha 20 Novembru aban, tanba nee mak enkontru nee lalais deit, tanba nee aban mak koalia barak liu liga ho asuntu labarik sira nia,” katak nia.
Tema ba loron mundial labarik ba tinan 2024 “Rona Ba Futuru”, no UNICEF nia serbisu babain mos rona ba labarik sira no UNICEF hakarak rona labarik sira nia hanoin, opinaun ka idea balun neebe liga ba moris loron loron nia.
UNICEF nafatin iha konsente hakarak labarik hotu hotu tenke iha oportunidade asesu ba eskola no moris ho kuidadu no naun violensia. Globalmente UNICEF mos iha hanoin katak labarik hotu hotu iha direitu ba edukasaun, deskansa, halimar no seluk tan.
Prezidente Republika Jose Ramos Horta disponivel atu partisipa loron mundial labarik neebe mak sei monu iha 20 Maiu, no Prezidente Republika mos babain gosta halo iterasaun ho labarik sira no Prezidente mos hakarak labarik sira moris livre husi violensia no seluk tan.
No prezidente iha programa neebe espesifiku ba labarik sira oinsa mak redus mal nutrisaun ba inan no labarik sira tanba nee kada loron sempre fo han labarik iha palasiu Prezidensial.
(eme)
