OECUSSE, STLTIMORLESTE.com – Uniaun Profisionál Jornalista Timor-Leste (UPJTL) realiza media tour ba Suku Bobometo, RAEOA, hodi haree diretamente atividade sosial no dezenvolvimentu komunidade.
Prezidente UPJTL, Horacio Babo hatete, atividade ne’e hala’o durante loron haat, nu’udar parte komemorasaun Loron Liberdade Imprensa, 16 Outubru.
Nia esplika, objetivu media tour mak vizita komunidade, halo diálogu no haree diretamente atividade sosial no dezenvolvimentu iha área rural.
“Ami halo media tour ba RAEOA atu vizita suku sira, halo diálogu no haree diretamente atividade sosial no dezenvolvimentu.”
Horacio Babo koalia ba jornalista sira iha Sede Suku Bobometo, Segunda-feira (05/10/2026).
UPJTL mos halo sosializasaun literasia media ba komunidade, liuliu estudante no joven sira iha eskola.
Materiál sosializasaun inklui utilizasaun diak media sosial, benefísiu media sosial no dalan atu identifika informasaun falsu.
Horacio Babo informa, jornalista na’in 10, reprezentante media nasionál, partisipa iha atividade media tour ne’e.
Sira halo kobertura atividade sosial no dezenvolvimentu komunidade, inklui área rural ne’ebé dala barak seidauk hetan atensaun media.
“Komunidade no estudante sira simu diak atividade ne’e, no ami kontente tanba bele besik liután ho komunidade.”
Nia argumenta, media tour sei kontinua ho kobertura atividade nasionál no lokál, liuliu iha área rural no munisípiu sira.
Nunee mos Xefe Suku Bobometo, Jose Labi Caet agradese ba UPJTL no media nasionál tanba vizita diretamente komunidade.
“Ami agradese tanba ita boot sira mai ho ekipa to’o ami nia fatin hodi haree diretamente kondisaun sosial komunidade.”
Jose Labi Caet hatete, komunidade Bobometo enfrenta dezafiu asesu ba merkadu, tanba distánsia merkadu nian dook hosi suku.
Durante vizita, ekipa media mos haree konstrusaun estrada ne’ebé hala’o hosi empreza nasionál no internasionál, inklui Waskita no IDS.
Suku Bobometo iha aldeia sia, mak Quiubecelo, Tumin, Nonquican, Saben, Usapikolen, Hoineno, Oenoah, Oebaha no Nianapu.
Tuir dadus autoridade suku, Bobometo iha uma-kain hamutuk 2.579, ho populasaun total ema 10.404.
Populasaun ne’e kompostu hosi mane 5.231 no feto 5.173, tuir informasaun autoridade Suku Bobometo.
(jen)
