OECUSSE, STLTIMORLESTE.com — Uniaun Profisionál Jornalista Timor-Leste (UPJTL) husu Prezidente RAEOA utiliza jornalista sira atu halo kobertura ba atividade no dezenvolvimentu iha rejiaun.
Prezidente UPJTL, Horacio Babo hato’o pedidu ne’e durante enkontru ho Prezidente RAEOA, Regio da Cruz Salu, iha rezidénsia, Kuarta-feira (07/10/2026).
“Nune’e, ami husu Prezidente RAEOA utiliza jornalista sira ba atividade. Se publikasaun la satisfaz, bele husu direitu resposta,” hatete Horacio.
Horacio hateten, media importante atu kontinua halo kobertura ba atividade Prezidente RAEOA no dezenvolvimentu iha rejiaun.
UPJTL hasoru Prezidente RAEOA hodi relata kona-ba atividade media tour ne’ebé jornalista sira hala’o durante loron haat iha RAEOA.
Media tour envolve jornalista husi RTTL, TATOLI, Timor Post, SM News, RTK, SAP News no STL, ho koperasaun Sekretaria Estadu Komunikasaun Sosiál.
Atividade ne’e foka ba fronteira, komunidade no juventude, inklui kobertura ba dezenvolvimentu iha área rural.
“Ami hakarak halo sosializasaun literasia media ba foinsa’e no komunidade sira, liuliu kona-ba utilizasaun media ho responsabilidade,” nia informa.
UPJTL mós halo kobertura ba infraestrutura, eletrisidade, bee no saneamentu iha komunidade rural durante atividade media tour.
Ekipa jornalista sira vizita Oesilo, Bobometo no Pasabe hodi haree diretamente progresu dezenvolvimentu no situasaun komunidade sira.
Durante vizita ba fronteira, ekipa jornalista hasoru Komandante PNTL ne’ebé hala’o inspesaun kona-ba situasaun seguransa iha área refere.
UPJTL mós halo sosializasaun literasia media iha eskola sira, ho fó atensaun ba estudante kona-ba utilizasaun responsavel media sosial.
Horacio hateten, atividade ne’e la’ós semináriu, maibé oportunidade atu lori jornalista husi Dili ba área rural.
Objetivu mak jornalista sira bele haree diretamente realidade komunidade no hato’o informasaun bazeia ba situasaun real.
Prezidente RAEOA, Regio da Cruz Salu, agradese UPJTL tanba hasoru diretamente no husu oportunidade ba media.
“Ami husu media kontinua halo publikasaun kona-ba lala’ok no dezenvolvimentu Oe-Cusse ba povu Timor-Leste,” nia deklara.
Regio hateten, media importante atu ajuda RAEOA hato’o informasaun kona-ba servisu no dezenvolvimentu ba autoridade sentral.
“Nasaun bele haree mudansa diak iha Oe-Cusse, tanba rejiaun ne’e enclave iha nasaun ida nia leet,” nia esplika.
Nia mós husu media atu halo avaliasaun ba dezenvolvimentu RAEOA liuhosi informasaun objektivu no bazeia ba realidade.
Regio subliña, fronteira Oe-Cusse presiza dezenvolve sai fronteira ekonomia, la’ós deit fronteira imigrasaun.
“Media importante atu ajuda ami hato’o servisu ba sentral, liuliu kona-ba dezenvolvimentu iha fronteira,” nia afirma.
(jen)
