DILI, STLTIMORLESTE.com – Ministru Asuntu Kombambates Libertasaun Nasional (MKLAN), Gil da Costa Monteiro “Oan Soru” hatete, veteranus ruma atu hetan kondekorasaun tenke tuir lei, laos ida-idak husu rasik.
Ministru Asuntu Kombambates Libertasaun Nasional (MKLAN), Gil da Costa Monteiro “Oan Soru” hatoo kestaun nee ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta (12/06/2026).
“Bainhira ita koalia asuntu ruma iha relasaun ho asuntu veteranu laos ita ida-idak husi husu. Tenke tuir regra sira, mak ka karik hanesan kombatentes ida tenke liu husi rejistu,” dehan Ministru.
Ministru hatete, agora se kondekorasaun ida neebe Prezidente Republika mak eskolla ka tuir lei la tuir konstituisaun neebe koalia konaba 1/5 Deputadus ativu iha Parlamentu Nasional atu propoin ema ruma ka konsiderasaun grupu ida nee nian katak sira konese kestaun seluk.
“Maibe laos ita individu ida-idak mak ba husu no laos ita ida-idak ka lori organizasaun ruma ba husu atu Prezidente Republika kondekora nee regra hanesan nee laiha. Tanba nee tenke iha Gabinete Prezidente Republika mos iha, komisaun ida uluk hau atan rasik halo parte naran komisaun de agrasiadu, ami dala ruma mai propoin nee ema neebe rejistadu katak ema ida nee hanesan kaixa prinsipal ida durante rezistensia ba ukun rasik-an ninian, entaun ami propoin atu bele hetan kondekorasaun orden Timor-Leste husi Prezidente Republika,” dehan Ministru Gil.
Nia hatete, laos Prezidente Republika agora deit maibe Prezidente Republika sira kotuk mos hanesan, mais laos ida-idak husu ninian, “neebe prontu hau hanoin ita respeita ema ida-idak ninia hanoin, mais buat hotu-hotu tenke liu husi rejistu ida, nunee ita ba nee ba ho dadus neebe kompletu. Tanba se lae publiku nee ema hanoin kondekorasaun sira ita halo nee naran halo arbiru deit, neebe ita tenke uniforme liu husi rejistu ruma,” katak nia.
Entaun Prezidente Republika ohin husu atu informa loloos buat neebe tuir lei artigu hira mak iha neeba mensiona no proteze ema sidadaun ida-idak nia direitu hanesan Kombatentes neebe bele hetan kondekorasaun neebe bele hetan diploma de onra no ida neebe bele hetan direitu ba pensaun.
Foin lalais eis Prizioneiru Cipinang husi Munisipiu Baucau husu Prezidente Republika Jose Ramos Horta nomos Primeiru Ministru Kay Rala Xanana Gusmao atu fo kondekorasaun medalha por meritu ba sira nain 18.
(eme)
