BAUCAU, STLTIMORLESTE.com – Husi fulan Abríl to’o Agostu tinan ne’e, ekipa Veterinária Munisípiu Baucau vasina ona asu hamutuk 675 no rejista asu 50 pozitivu ba rabies, enkuantu asu 6 hetan rezultadu negativu.
Médiku Veterinária Munisípiu Baucau, Zelia Ximenes, hateten katak atividade vasinasaun ne’e hala’o ona iha área juridisaun Munisípiu Baucau, liuliu iha lokalidade sira ne’ebé identifika ona kazu ka iha indikasaun kona-ba risku transmisaun rabies.
Nia hateten katak ekipa veterinária kontinua hala’o vasinasaun durante fulan Setembru. Atividade ne’e sei kontinua to’o ekipa rekoilha no kompila dadus hosi área sira hotu, atu bele fó informasaun kompleta ba públiku kona-ba progresu no situasaun rabies iha munisípiu.
“Iha Setembru nian ami sei la’o hela vasinasaun. Depois ami rekoilha hotu mak ita relata fali ba públiku,” hateten Zelia Ximenes ba jornalista sira hafoin fó vasina anti-rabies ba asu iha Buruma, Kuarta (30/09/2026).
Tuir nia, vasinasaun ne’e la’ós atividade ne’ebé foin hahú iha fulan Setembru. Ekipa veterinária Munisípiu Baucau hahú ona intervensaun husi fulan Abríl, bainhira kazu rabies komesa identifika iha área sira iha Munisípiu.
“Ami la’ós foin hala’o vasina ne’e, maibé teknikamente desde Abríl kedas, bainhira kazu iha, ami la’o hala’o vasinasaun,” hateten nia.
Vasinasaun bazeia ba área afetadu
Zelia esplika katak, tuir karta sirkular ne’ebé estabelese ona, asu ne’ebé komunidade hakiak tenke hetan vasina anti-rabies. Medida ne’e importante atu prevene propagasaun vírus rabies, liuliu iha área ne’ebé iha ona kazu.
Maibé, implementasaun vasinasaun ba asu hotu-hotu iha komunidade seidauk hala’o ho forma masal, tanba ekipa veterinária Munisípiu seidauk simu orientasaun hosi parte nasionál kona-ba oinsá programa ne’e tenke implementa iha terrenu.
Tanba situasaun ne’e, ekipa veterinária adopta abordajem bazeia ba nesesidade iha área. Vasinasaun fó prioridade ba lokalidade sira ne’ebé identifika ona kazu rabies ka konsidera iha risku, no mos depende ba preparasaun no pedidu hosi komunidade.
Nune’e, bainhira komunidade ida husu apoiu atu vasina sira-nia asu, ekipa veterinária bele hala’o intervensaun tuir kondisaun no disponibilidade iha área refere.
(tom)
