DILI, STLTIMORLESTE.com – Eis Deputadu PD, Virgílio Hornai, husu veteranu sira respeita malu no labele julga arbiru, tanba ukun-an mai husi unidade nasional.
Nia dehan, maluk sira ne’ebé tau karimbu ba an rasik dehan, sira mak luta dór presiza sukat no tetu.
“Maluk sira nebe tau karimbu ba an rasik hodi depende an deit, sira mak luta dor ne’e presiza sukat no tetu,” nia hatete ba STL, iha Dili, Tersa (29/09/2026).
Eis Figura Politiku no Eis Membru Konsellu Estadu nee hatutan, prosesu polítiku ne’ebé Maun Boot halo hodi husik tiha polítika divizionizmu, no grupu partidária rezisténsia úniku sai forsa polítika konquista apoiu internasionál.
“Maun Boot halo mudansa hodi husik politika diviziosmu, grupu partidaria rezistensia uniku, hodi hamutuk iha fileira unidade nasional,” nia subliña.
Tuir nia, ema ida labele hatudu liman ba ema seluk tanba vitória ne’ebé povu hetan, rezultadu husi unidade nasionál ne’ebé la hare ba estatutu polítiku anterior.
“Ema ida labele hatudu liman ba ema seluk, tanba vitoria nebe povu ganha rezultadu husi unidade nasional,” nia afirma.
Eis Deputadu nee fó ezemplu katak, nia pelumenus koñese di’ak Irmão Adérito de Jesus ne’ebé parte ba família husi Ministra Dulce nian.
“Hau pelu menus koinese diak Irmaub Aderito de Jesus, nebee parte ba familia husi Ministra Dulce,” nia hatete.
Virgílio esplika nia rasik tama ekipa kampaña nasionál CNRT ba rejiaun norte hanesan Liquiçá, Ermera, Bobonaro no enklave Oe-Cusse.
“Ami tama equipa campanye nasional CNRT ba rejiuan norte hanesan Liquisa, Ermera, Bobonaro no enclave Oecusse” nia hatutan.
Nia hatete, laiha razaun atu julga ema arbiru tanba saida mak nia halo, só nia família ho ema ne’ebé nia iha relasaun mak bele hatene.
“Laiha rajaun atu julga ema arbiru, tanba saida mak nia halo so nia familia mak bele hatene,” nia dehan.
Nia afirna, luta ne’e ema barak fó nia partisipasaun no nia rasik partisipa direta iha kampaña nasionál, oinsá última oras maluk ho diferensa polítika fó apoiu ba ukun-an.
“Hau pelumenus partisipasaun direta iha kampana nasional, hodi oinsa ultima oras maluk ho diferensia politiku fo apoiu ba ukun an,” nia afirma.
Nia fó sasin katak Fohó Loelaco no Marobo sai sasin, oinsá ekipa bele ultrapasa atake oioin ba ekipa kampaña iha tempu ne’ebá.
“Foho Loelaco no Marobo, sai sasin oinsa equipa ne’e bele ultra pasa ataques ba equipa,” nia hatete.
Virgílio subliña katak julga ema maibé la hare kontribuisaun, husi ema nia maun-alin ne’ebé ho totalidade ba servisu ukun-an la loos.
“Julga ema maibe la hare kontribuisaun husi ema nia maun alin, nebee ho totalidade ba servisu ukun an,” Virgilio sublina.
Nia hatutan, istória luta ne’ebé Maun Boot Xanana halo mudansa ba polítika luta hosi CNRM ba CNRT, konsege halibur ema hotu sem hare ba afiliassun polítika anterior.
“Ukun an ida ne’e ho modalidade politika unidade nasional, ne’ebe konsege halibut ema hotu sem hare ba afiliasaun anterior,” nia afirma.
Iha parte ketak, Akademista UNTL, Silvino de Oliveira, hatete abordajen unidade nasionál ne’ebé Maun Boot Xanana, hili sai modelu polítiku matenek atu halakon divizaun interna rezisténsia.
“Abordajen unidade nasional ne’ebe Maun Boot Xanana hili, sai modelu politiku matenek atu halakon divizaun interna,” nia hatete.
Silvino hatutan, presiza prezerva memória koletiva liu husi edukasaun sivika, atu jerasaun foun komprende ukun-an la’os monopóliu grupu ida nian.
Entretantu, Veteranu Agostinho de Araújo, hatete veteranus hotu-hotu fó ona kontribuisaun tuir kapasidade, no fatin idak-idak nian iha tempu rezisténsia.
“Veteranu hotu-hotu fo ona kontribuisaun tuir kapasidade, no fatin idak-idak nian iha tempu rezistensia,” nia hatete.
Agostinho dehan, agora tempu ona atu hakribi ego polítiku, no promove diálogu malu hodi hametin respeitu no rekoñesimentu ba malu.
(car)
