DILI, STLTIMORLESTE.com – Relasiona ho vistu previa husi Camara de Contas ba iha projeitu sira, sei haree atividade sira no orsamentu neebe iha.
“Servisu Camara de Contas halo kontrola deit, projetu boot sira neebe presiza vistu husi Tribunal de Contas ida nee mak sira halo mai, hau la hatene numeru hira husi neeba maka Tribunal de Contas sei haree fali nia atividade orsamentu nee liga ho orsamentu Jeral Estadu ka lae,” dehan Prezidente Tribunal Rekursu, Afonso Carmona ba jornalista sira iha Hotel Timor, hafoin remata lansamentu ba manual, Kinta (28/05/2026).
Nia hatutan, dala ruma mosu problema tanba, sira nia atividade husu mai nee bele ses husi orsamentu neebe aprova, se ses husi nee tenke haruka fila fali halo kompletu tuir regra neebe iha.
Ezemplu, iha lei dehan projeitu neebe labele ezekuta maibe bele aumenta husi projeitu seluk maibe nia labele liu 20 porsentu, dala ruma mosu problema sira hola nee liu tiha 20 porsentu, ida nee maka dala ruma mosu problema Tribunal la fo vistu. Tanba nee dala ruma laos Tribunal maka lakohi fo vistu hodi atividade la lao, maibe sira ses husi regra neebe iha.
Esplika, tuir PTR nia hare sira bele foti husi 20 porsentu ba projeitu seluk, no 20 porsentu ba projeitu nee tau hamutuk hodi lao, maibe sira foti ida nee liu tiha entaun, problema iha lei ona, laos Tribunal maka halo politika atu atividade labele lao.
Dehan iha lei hateten momos dehan, atu foti husi ida neeba koloka fali mai iha ida nee, labele liu 20 porsentu.
Hatan konaba projeitu hirak maka hetan ona vistu previa nia dehan, seidauk fo komentariu konaba projeitu boot hirak maka hetan ona vistu previu, maibe nia foin hetan informasaun konaba projeitu Aereportu nian, maibe labele koalia uluk antes Kamara de Kontas relata. Tanba agora prepara relatoriu anual nian, sira hotu hatama sira nia atividade depois halo konkluzasaun maka foin informa konaba, projeitu hirak maka hetan ona vistu.
Iha fatin ketak, Akademiku UNTL Rafael de Jesus dehan, Tribunal atu halo vistu tenke hare didiak, atu projetu sira neebe halo tenke tuir valor neebe loos.
“Hanoin importante duni Tribunal atu halo vistu tenke hare didiak, atu projeitu sira neebe halo tuir duni valor orsamentu neebe loos,” dehan nia.
Hatutan tan, ho orsamentu planu no atividade neebe los, projeitu neebe halo mos ho kualidade lori benefisiu ba povu.
(ter)
