BAUKAU, STLTIMORLESTE.com – Vitima ba asidente iha Suku Vemasi, Postu Administrativu Vemasi, Munisipiu Baukau, Belina Pedrita Faria alta ona husi Hospital Rejional Eduardo Ximenes (HoREX) Baukau.
Vitima Belina Faria nia inan, Rita Correia aprezenta, hafoin asidente iha Vemasi nee parte ambulansia too kedas fatin evakua vitima ba Sentru Saude Vemasi no kontinua kedas ba Hospital Rejional Eduardo Ximenes (HoREX) Baukau halao tratamentu, tanba hetan kanek iha parte ren-tos, maibe iha neebe loron 15 Maiu nee alta ona husi sala emerjensia HoREX Baukau.
“Nia diak oituan mais todan mak iha nia ulun nee, dala ruma monu ba rai nee mak hanesan nee, nia agora hanoin hela nia kolega neebe sei trauma” inan Rita Correia hateten ba STL liu husi telefone (15/05/2026).
Nia haktuir, vitima sira sai husi uma iha loron 14 Maiu 2026 parte loraik, hein hela transporte tum tum atu ba eskola ensinu sekundaria Vemasi ensaiu drumband ba seremonia nasional loron 20 Maiu, maibe karreta Estadu refere diresaun husi Baukau Vila ba Dili ho velosidade soke vitima sira neebe hamriik hela iha nia diresaun.
“Hau triste, tanba ita nia oan hamriik hela estrada sorin atu ba diresaun Baukau nian mak karreta iha estrada sorin ba Dili nian mai soke fali sira nee nain rua nee ita la hatene loos nia jalur nee,” Inan nee katak.
Enkuantu Sancho Faria Freitas neebe iha fatin asidente haktuir, molok hetan asindente nee vitima sira atu ba atividade ida iha eskola no hamriik iha estrada ninin no karreta estadu nee diresaun husi Baukau ba Dili ho velosidade derepenti taturu vitima ida iha karreta leten no ida monu ba rai enkuantu nain ida desmaia.
“Karreta nee ho velosidade derepente tarutu hau haree matebian iha tiha karreta leten, ida oan espelhu kona agora kanek baixa hela nee mak monu tun iha rai, ida nasa nee monu tiha ba duut laran, ida fali nee haree kolega nain rua nee trauma halai ba kedas uma,” hateten Sancho Faria Freitas.
Sidadaun feto jovem sira neebe vitima ba asidente nee mak hanesan, Inacia Enriqueta Soares mate fatin, Belina Pedrita Faria kanek iha parte ulun enkuantu Livania Faria desmaia, tanba haree nia kolega nain rua hetan soke.
Relasiona asidente nee, vitima Belina nia inan no Sancho Faria Freitas husu Komando Polisia Munisipiu Baukau atu prosesu kazu nee.
Liga asidente nee, STL tenta komfirma Komadante Komando Polisia Munisipiu Baukau, maibe seidauk iha komentariu, tanba sei rekolha dadus no iha faze identifikasaun.
Entretantu asidente nee akontese iha loron 14 Maiu 2026 parte loraik involve husi karreta Estudu sapa matrikula 05-469 G diresaun husi Baukau atu ba Dili.
(tom)
