BAUCAU, STLTIMORLESTE.com – Atual komunidade afetadu ba dezastre naturais iha Munisípiu Baucau hamutuk uma kain 68, maibé seidauk simu apoiu emerjensia husi Autoridade Protesaun Sivíl (APC).
Komandante Operasaun APC Munisípiu Baucau, Francisco Viana Freitas esplika katak, durante periodu fulan Setembru 2026, ekipa APC hala’o ona levantamentu no verifikasaun ba uma kain sira ne’ebé afetadu husi dezastre naturais, inklui anin sobu, ai hanehan no insendiu.
Maibé, apoiu emerjensia seidauk bele distribui ba vítima sira tanba stok fós iha armajen APC Baucau hotu.
“Liuhusi ami nia verifikasaun, to’o agora hamutuk 68 uma kain sira ne’e ami hein deit distribuisaun emerjensia ba sira bainhira fós mai ona,” hateten Francisco ba jornalista sira iha nia fatin knaar, Tirilolo, Baucau, Tersa (22/09/2026).
Nia hateten katak, APC Munisípiu Baucau aprezenta ona pedidu ba nivel nasionál atu fornese fali stok fós ba armajen APC Baucau, maibé to’o agora seidauk hetan resposta kona-ba pedidu refere.
Tuir Francisco, apoiu emerjensia ba vítima dezastre naturais kompostu husi ai-han no la’ós ai-han. Item sira hanesan biskuit, mina tein, balde no nesesidade seluk sei disponivel, maibé falta fós sai obstákulu ida atu APC bele kompleta distribuisaun ba vítima sira.
Tanba ne’e, Francisco husu nivel nasionál atu aselera prosesu fornese no transferénsia stok fós ba armajen APC Baucau, tanba kondisaun vítima sira la hanesan.
Nia hateten, vítima sira ne’ebé afetadu husi anin sobu no ai hanehan sei bele tein no prepara ai-han tanba sira sei iha fós, maibé situasaun ba vítima insendiu diferente tanba sira lakon sasan no ekipamentu importante sira iha uma.
“Vítima hirak ne’e presiza tebes apoiu emerjensia, liu-liu vítima insendiu sira, tanba sira nia sasan laiha ida aproveita. Entaun sira presiza tebes apoiu husi Autoridade Protesaun Sivíl,” dehan Francisco.
Komandante Operasaun APC Munisípiu Baucau husu ekipa nivel nasionál atu aselera prosesu transferénsia stok fós ba Baucau, nune’e APC bele kontinua fó apoiu emerjensia ba vítima dezastre naturais sira ne’ebé rejistu ona.
Entre tempu, APC Munisípiu Baucau rejistu hamutuk uma kain 68 ne’ebé afetadu husi dezastre naturais. Husi total ne’e, uma kain 64 afetadu husi anin sobu no restu uma kain sira afetadu husi insendiu.
(tom)
