DILI, STLTIMORLESTE.com – Jurista Timor oan konsidera katak, krime Violensia Domestika kontinua rejista ho numeru aas, tanba vitima sira iha ona konhesimentu konaba lei Violensia Domestika, nunee sira barani hatoo keixa.
“Hau hanoin labele tauk hatoo keixa, tanba atu halo prevensaun ba iha krime Violensia Domestika tenke hato’o keixa, se hasoru violensia mak nonok deit iha futuru bele kontinua akontese nafatin,” dehan Jurista Jose Maria Guterres ba STL iha Kaikoli, Sesta (21/08/2026).
Nia hatutan, ohin loron krime Violensia Domestika kontinua rejista aas, ida nee hatudu katak, inan sira neebe hasoru Violensia Domestika iha ona konhesimentu konaba lei neebe iha.
Esplika tan, ohin loron iha ema balu seidauk iha konhesimentu konaba lei Violensia domestika, tanba nee fasil ba sira atu pratika aktu violensia. Nunee presiza mos halo sosializasaun ba iha lei Violensia domestika, atu nunee bainhira ema iha ona konhesimentu konaba lei Violensia domestika, sira tauk atu komete krime Violensia Domestika.
Iha sorin seluk, Akademiku UNTL, Rafael Dos Santos dehan, inan sira neebe hasoru Violensia Domestika labele tauk hato’o keixa, tanba iha lei atu regula aktu nee.
“Hau hanoin enkoraja inan sira neebe hasoru Violensia Domestika labele tauk hato’o keixa, tanba hato’o keixa mak dalan diak atu halo prevensaun,” dehan nia.
Sublina tan, husu atu organizasaun neebe iha kontinua sosializa lei Violensia domestika ba komunidade sira neebe iha area remotas, nunee sira bele iha konhesimentu ba lei neebe atu labele pratik aktu violensia.
(ter)
