DILI, STLTIMORLESTE.com – Diresaun Jeral Turizmu husi Ministeriu Turizmu no Ambiente (MTA) tenta nafatin para bele maksimiza rekursu plataforma online sira liu husi website turizmu Timor Leste (TL) neebe iha, hodi promove liu tan numeru turista mai TL nomos melhora liu tan sira nia esperiensia wainhira iha rai laran.
Diretor Jeral Turizmu, Antonio da Silva hatete, ho website turizmu neebe lansa nee para bele promove liu tan TL nuudar destinasaun turizmu ba iha merkadu nasional no internasional.
Nia afirma, lansamentu website nee hodi atualiza fali website neebe mak rejistu ona. Nia laiha mudansa, maibe muda deit mak nia kontiudu sira. Primeiru mak muda nia kontiudu ba informasaun sira, tantu informasaun produtu neebe mak iha husi tasi, foho no atividade neebe mak iha relasaun ho atividade turizmu nian rasik, inklui iha laran tau estabelesimentu mos ba nain restaurante, hotel no nain ba propriedade sira integra hotu iha website nia laran.
“Diresaun Jeral Turizmu husi MTA tenta nafatin para bele maksimiza rekursu plataforma online sira liu husi website turizmu TL neebe iha, hodi promove liu tan numeru turista mai TL nomos melhora liu tan sira nia esperiensia wainhira iha rai laran. Importante husi website nee ema hotu nian, nain ba website laos deit governu mesak mak atu jere maibe informasaun barak liu iha laran nee mak sira neebe fornesedor turistiku sira husi nain ba restaurante, hotel, transportasaun aluga sira, coffee shop no seluk tan. Neebe barak liu nee mak setor privadu sira,” dehan nia ba jornalista iha lansamentu Website Turismu Timor Leste iha Pavilliun II CCD, Kuarta (12/08/2026).
Nia haktuir, nee mak tenta iha estabelesimentu turistiku nee mak tenke ho kualidade neebe diak, importante liu mak numeru telefone nee iha, karik bele iha mos email. Hili fatin no kodisaun kapas no furak, karik senti hodi bele fornese ba ema estranjeiru sira bele halo pedidu mai para hatama sira nia fornesementu servisu nee iha website nee rasik. Iha laran mos halo integridade ba mapa inklui mos informasaun audisional visa no fasilidade aviaun mai TL.
Nia katak, iha website nee autoriza mos sistema transportasaun, tanba Dili ho munisipiu sira nomos Dili ho Atauro. Importansia seluk ida mak lingua, neebe iha website nee lingua Inglez, Mandarin, Franza, Japanes, Português no tetun rasik. Tanba Timor oan mos presiza hatene turistiku sira nee.
Nia hatutan, iha neeba integra mos AI nee para fasilita bainaka sira bainhira sira esplora informasaun sobre TL. Porezemplu nia hakarak mai TL, iha Australia nia hakerek deit iha AI nee hakarak mai TL loron 5 favor ida rekomenda hela ba. Entaun AI nee rasik bele prepara hela opsaun neebe diak ba nia. Website nee tarjetu diretamente ba sira neebe mak atu halo atividade viajen nee mai TL.
Nia dehan, website ida anterior nee estabelese kedas iha 2017 neebe tenke atualiza liu husi informasaun no imajen hodi bele fasilita liu tan. Uluk nee mos diak fo informasaun maibe hanesan brosur deit, maibe ida agora nee lae interaktivu kedas.
Iha fatin hanesan Personal Assistant ba General Manajer Timor Plaza, Maria marques hatete, website turismu TL nian nee hanesan fasilidade neebe diak tebes ba restaurante no otel.
“Liu-liu ba ami neebe halo negosiu, tanba bainhira ema atu mai vizita TL ema hein one klik deit, sira hatene kedas informasaun sira nee. Antes nee ita laiha informasaun neebe klaru, entaun ema sei buka. Mais agora ba iha website nee sira bele hatene fatin no hahan neebe klaru liu, neebe buat nee benefisia tebes ami,” dehan nia.
Nia hatutan, ida nee meius neebe fasilita duni ema sira hanesan negosiu no bisnis, ida nee hanesan promove mos bisnis privadu sira.
Nia katak, website ida nee diferente ho ida uluk, tanba uluk ema klik mais laiha informasaun klaru hanesan website ida agora nee. Mais agora nee ho one klik deit bele asesu hotu informasaun iha neeba.
“Ami nia lista iha laran hotu ona mak Timor Plaza Hotel no Apartemen, Panorama Restaurant iha laran hotu ona,” tenik nia.
(dom)
