DILI, STLTIMORLESTE.com – Movimentu transporte husi Ainaro-Mau-Ulo ba Bobonaro di’ak ona, hafoin WTJ hadia estrada Mota Mathohu.
Kompanha WTJ hadia ona estrada ne’ebé monu no hetan estraga husi udan no rai-halai, iha área Mota Mathohu Suku Mau-Ulo, Postu Administrariva Ainaro, Munisipu Ainaro, iha loron Segunda (28/09/2026).
Atualmente kompanha fakar no atiru rai iha estrada kuak no aat, atu transporte bele halo movimentu ba-mai ho di’ak.
“Durante ne’e estrada hetan estraga, husi udan no rai-halai iha Mota Mathohu refere hadia ona husi Kompanha WTJ,” hatete Xefe Suku Mau-Ulo, Luís Valadares Colaço ba STL liu husi telefone, Tersa (29/09/2026).
Hanesan lideransa komunitáriu Suku Mau-Ulo hato’o agradesimentu, obrigadu no deskulpa ba Kompanha WTJ tanba sempre ezije atu hadia estrada refere.
“Ami hato’o obrigadu no deskulpa ba Kompanha WTJ, tanba durante ne’e ami sempre ezije atu hadia estrada ne’e,” hatete Autoridade Lokal nee,
Nia hatutan, estrada refere sai ligasaun importante ba transporte, husi Ainaro-Mau-Ulo ba Bobonaro ne’ebé antes labele halo movimentu.
“Tanba estrada aat transporte labele movimentu ba-mai, husi Ainaro-Mau-Ulo ba Bobonaro, agora di’ak ona,” nia hatutan.
Husi parte seluk, Observadór Ekonomia José da Costa, hatete asesibilidade estrada sai kondisaun prinsipál atu movimenta produtu lokál no hasa’e ekonomia rurál.
“Estrada di’ak mak xave ba movimentu produtu lokal, no hasa’e ekonomia rural iha Suku Mau-Ulo,” nia hatete.
José hatutan, intervensaun lalais husi setór privadu hanesan WTJ hatudu parseria di’ak entre komunidade, governu no kompañia privadu.
“Intervensaun lalais husi kompanha hatudu parseria diak entre komunidade, governu no setor privadu,” nia afirma.
Entretantu, Akademista UNPAZ Samuel de Jesus, hatete hadia estrada urjente presiza konsidera mós, aspestu reziliénsia ba dezastre klimátiku iha futuru.
“Hadia estrada la’os deit taka kuak, maibé tenke harii reziliente ba udan no rai-halai iha futuru,” nia hatete.
Samuel dehan, governu lokál presiza iha planu manutensaun rutina ho drenajen di’ak, atu prevene estragu repete iha tempu udan.
“Governu lokal presiza planu manutensaun rutina ho drenajen diak, atu prevene estragu repete iha tempu udan,” nia afirma.
(car)
