DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Timor Leste (TL) agradese iniasiativa husi PM Singapura, Lawrence Wong, neebe deklara katak atu harii Embaixada iha Dili.
“Hau mos simu ho kontentamentu desizaun Singapura atu loke Embaixada rezidente ida iha Dili,” hatete PM Xanana liu husi konferensia imprensa neebe halao iha Palasiu Governu, Sesta (03/07/2026).
PM Xanana afirma, inisiativa harii Embaixada iha Dili hanesan símbolu ida atu hametin relasaun entre nasaun rua iha futuru.
“Ida nee marka etapa importante ida iha relasaun entre ita nia nasaun rua no sai simbolu forte ba konfiansa Singapura nian ba TL no nia kompromisu atu hametin parseria ba futuru,” esplika nia.
Nia akresenta liu tan katak, bainhira halao vizita ofisial ba Singapura iha tinan kotuk, nia ho Primeiru Ministru Wong koalia kona-ba oinsa atu harii ekonomia ida neebe forte no bele kria servisu no fo oportunidade ba povu.
Nia dehan, atu TL bele sai nasaun ida neebe reziliente liu, mak presiza harii ekonomia produtiva ida.
“Ita presiza investimentu neebe bele kria servisu no apoia dezenvolvimentu setor privadu,” dehan PM Xanana.
Nia mos reforsa liu tan katak, TL simu ho laran luak investimentu husi Singapura, inklui iha area konstrusaun, turizmu, servisu saude no dezenvolvimentu ekonomia azul.
Iha fatin hanesan, Primeiru Ministru (PM) Singapura, Lawrence Wong hatete katak, estabelesimentu Embaixada rezidente iha Dili marka pasu importante iha relasaun bilateral entre nasaun rua.
“Iha tinan 2024, Singapura loke Embaixada rezidente iha Dili no iha tinan ida nee ami nomeia embaixador rezidente dahuluk. Ida nee hatudu ami nia kompromisu atu hametin parseria ho TL,” dehan PM Lawrence Wong.
(alb)
