DILI, STLTIMORLESTE.com – Primeiru Ministru (PM), Kay Rala Xanana hatete, dezenvolvimentu nasional tenke aposta mos iha rekursu umanu husi esperiensia Timor-oan nian.
Primeiru Ministru, Kay Rala Xanana Gusmão hatoo kestaun nee liu husi nia diskursu, bainhira halo lansamentu ba konstrusaun solar PV iha Munisipiu Manatuto, Tersa (23/07/2026) hatete, Dezenvolvimentu Nasional lao ba oin tenke aposta ho rekursu umanu.
“Ita nia dezenvolvimentu nasional tenke aposta mos iha ita nia rekrusus umanus no iha konesimentu, iha kompetensias no iha experiensia Timor-oan nian. Projetu nee sei fo mos formasaun ba ekipa teknika EDTL durante instalasaun, operasaun ho manutensaun. Transferensia kompetensias nee esensial tanba ita presiza enjeneirus, teknikus ho traballadores Timor-oan neebe bele opera no mantein infraestruturas modernas. Projetu nee sei apoia mos formasaun teknika ho investigasaun ba estudantes iha Timor- Leste. Nee sei fo ba joven timoroan sira oportunidade atu aprende kona-ba jerasaun enerjia solar,armazenamentu iha baterias ho sistemas eletrikus modernus,” dehan Primeiru Ministru Xanana Gusmão.
Primeiru Ministru hatete, ho lansamentu konstrusaun Solar PV sei ajuda prepara joven sira atu apoia dezenvolvimentu iha setor enerjetiku iha futuru. Nee sei fo ba joven timoroan sira oportunidade atu aprende konaba jerasaun enerjia solar, armazenamentu iha baterias ho sistemas eletrikus modernus. Projetu nee mos sei kria empregu durante konstrusaun, neebe sei demora 18 too 24 mezes.
“Hau enkoraja empreza sira neebe envolve iha projetu nee atu emprega no forma traballador timoroan sira bainhira bele no atu servisu halo kolaborasaun diak ho komunidade lokal sira. Projetu nee mos hanesan ezemplu diak ida husi papel neebe ita nia setor privadu tenke dezempena iha ita-nia dezenvolvimentu nasional,” dehan PM Xanana.
Xefe Governu hatete, iha tinan sira dahuluk independensia, Governu tenke asumi papel prinsipal iha konstrusaun bazes ba Estadu.
“Ita harii instituisoens ho infraestruturas nasionais tanba presiza tebes ba ita nia povu no ba dezenvolvimentu ita nia ekonomia. Agora, Timor Leste tenke konstrui setor privadu ida neebe forte no produtivu liu. Ita-nia setor privadu tenke krexe atu nunee bele kria empregu, dada investimentu bo tulun sustenta Estadu ida neebe forte no sustentavel. Ita presiza kooperasaun entre Estadu, emprezas nasionais ho investidores internasionais responsaveis,” katak Xanana.
Xanana hatete, projetu nee sei implementa iha ambitu hanesan modelu Produtor Independente Enerjia (PIE). ITOCHU husi Japaun ho EDF husi Fransa kria tiha ona Manatutu Renewable Power hodi implementa projetu nee. Setor privadu sei finansia, konstrui, opera no mantein sentral nee. Enerjia eletrika sei fornese ba EDTL.
Investimentu ho besik 107 milhões dolares. Nee hanesan investimentu boot tebetebes ida iha Timor-Leste. Nia lori kapital, teknolojia ho experiensia internasional atu apoia prioridade ida husi dezenvolvimentu nasional.
(eme)
