DILI, STLTIMORLESTE.com – Primeiru Ministru(PM), Kay Rala Xanana Gusmão hatete, Governu sei esforsu makaas ho ministeriu importante sira hodi hamos tiha Jogu Online ilegal iha Timor Leste (TL).
Primeiru Ministru Kay Rala Xanana Gusmão hatoo kestaun nee ba jornalista sira, bainhira remata halo enkontru semanal ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kinta (23/07/2026) hatete, Governu sei esforsu makaas hodi hamos jogu online iha Timor Leste.
Primeiru Ministru Kay Rala Xanana Gusmão hatete, mai informa ba Prezidente Republika katak, Governu aprova ona lei ida hodi haruka ba Parlamentu Nasional atu aprova liga ho jogu online ilegal iha TL.
“Prezidente atu sai, ami fo poder ba Visi Ministra Sejuina Maria Gomes atu ba asina akordu ida iha Vanuatu konaba vistu nomos kooperasaun teknika. Hau informa hela ba Prezidente halo servisu Governu, ho instituisaun importante atu hamoos tiha jogu online,” katak Primeiru Ministru, Xanana Gusmão.
Primeiru Ministru hatete, liga ho jogu online daudaun barak iha Timor Leste hanesan ema hotu hatene. Tanba nee, Governu mos halo esforsu makaas hodi hamoos tiha nunee labele hafoer Timor nia naran.
“Horiseik ami aprova tiha lei ida atu Parlamentu aprova atu fo kbiit halo dekretu lei konaba jogu online, tanba iha mundu nee ohin loron problema boot, iha relatoriu ONU nia horiseik mos hau simu relatori ONU nia konaba krime sibernetika nia iha Sudeste Asiatiku, Timor mos tama iha laran, hau nia liafuan mak nee deit toleransia jero, ami sei hakaas nafatin iha ona relasaun kooperasaun ho ASEAN nia konaba ida nee, imi hotu hatene Xina mak mai husi Kambodia mak sira halai mai Timor,” dehan Primeiru Ministru.
PM Xanana hatete, toleransia jero maske Timor Leste la lakon osan maibe sira mai joga ilegal iha TL halo Timor mak naran foer, tanba nee mak Primeiru Ministru informa ba Prezidente.
“Hau imforma mos ba Prezidente katak ohin hau iha Delta Nova loke treinamentu ba loron rua ba tekniku sira iha kada Munisipiu konaba projetu PDIM ho PNDS neebe lao diak tanba instituisaun estadu lao nafatin,” katak PM.
Projetu balun hahu iha 2019-2022 seidauk lao husik hela ida nee mak tenke hadia labele husik hela.
“Ba Governu lokal ohin hau dehan ona ba PAM sira hotu, ba Governu lokal kuandu temi preparasaun ba Governu lokal nee setor hotu hotu, rua bele lao diak mais seluk kuandu lao ladiak seidauk serve, sei hein too diak hotu tiha mak lao,” katak PM Xanana.
(eme)
