DILI, STLTIMORLESTE.com – Primeiru Ministru (PM), Xanana Gusmão sei hala’o vizita ofisiál semana-ida iha Tailándia, hodi hametin kooperasaun bilaterál no parseria estratéjika Timor-Leste ho Tailándia.
Tuir nota komunikadu ne’ebé STL asesu husi Media Gabinete Primeiru-Ministru (GPM), iha Domingu (04/10), Xanana Gusmão sei hala’o enkontru bilaterál ho Primeiru-Ministru Tailándia, Anutin Charnvirakul.
Enkontru ne’e sei diskute asuntu sira ne’ebé iha interese komún ba Timor-Leste no Tailándia, inklui kooperasaun iha área estratéjika.
Iha enkontru ne’e, Xefe Governu Timoroan sei partisipa mós iha serimónia asinatura akordu kooperasaun entre nasaun rua.
Hafoin serimónia asinatura akordu, Primeiru-Ministru Tailándia sei oferese almosu ofisiál ba Xanana Gusmão no nia delegasaun.
Aleinde enkontru bilaterál, Xanana Gusmão sei partisipa iha konferénsia kona-ba Fundu Petrolíferu, ne’ebé sei hala’o durante loron-rua, 6 no 7 Outubru, iha JW Marriott Hotel, Bangkok.
Konferénsia ne’e sei marka prezensa Ministru Finansas Tailándia, Governadór no membru sira hosi Konsellu Administrasaun.
Iha programa vizita ofisiál, Xanana Gusmão sei vizita sidade Nonthaburi, kapitál Provínsia Nonthaburi no konsidera nu’udar sidade boot daruak iha Tailándia.
Depois vizita Nonthaburi, Xefe Governu sei vizita Thailand Environment Institute (TEI), nu’udar parte hosi programa vizita ofisiál iha nasaun ne’e.
Xanana Gusmão sei hala’o mós enkontru ho reprezentante setór privadu, inklui Thai Beverage Public Company Limited, hodi buka oportunidade ba kooperasaun ekonómika no investimentu.
Primeiru-Ministru Xanana Gusmão ho delegasaun sei fila fali ba Dili iha Domingu, 11 Outubru 2026.
(dom)
