DÍLI, STLTIMORLESTE.com — Desizaun Primeiru-Ministru (PM), Xanana Gusmão hodi hili Ministru Justisa, Sérgio Hornai nu’udar Primeiru-Ministru Interinu, durante nia ausénsia, hamosu diskusaun iha públiku.
Sérgio Hornai asume kargu Primeiru-Ministru Interinu durante períodu Xanana Gusmão hala’o visita ofisiál ba estranjeiru, hodi lidera no garante kontinuidade servisu ezekutivu Governu.
Desizaun ne’e sai asuntu diskusaun tanba iha kargu Vise-Primeiru-Ministru iha estrutura IX Governu Konstitusionál, ne’ebé mos bele asume responsabilidade lideransa durante ausénsia Primeiru-Ministru.
Observador polítiku, Samuel da Costa, kestiona kritériu no orden xefia ne’ebé uza iha delegasaun kargu Primeiru-Ministru Interinu durante ausénsia Xanana Gusmão.
Tuir Samuel, pozisaun Vise-Primeiru-Ministru eziste iha estrutura IX Governu Konstitusionál, no normalmente bele asume responsabilidade lideransa durante ausénsia Primeiru-Ministru.
“Públiku kestiona tanba kargo Vise-Primeiru-Ministru eziste, maibé Governu foti ministru ida atu asume PM Interinu,” dehan Samuel ba STL, iha Mandarin, Dili, Tersa (06/10/2026).
Nia hateten, Primeiru-Ministru iha kompeténsia atu hili membru Governu ne’ebé konsidera apropriadu hodi reprezenta nia durante ausénsia.
Maibé, Samuel husu Governu atu fó klarifikasaun públika kona-ba razaun no kritériu ne’ebé uza, atu evita interpretasaun kona-ba konfiansa polítika.
Iha parte ketak, Akademista Universidade da Paz (UNPAZ), Adelino Soares, konsidera nomeasaun ne’e nu’udar prerogativa Primeiru-Ministru nian, tuir kompeténsia konstitusionál.
“Esplikasaun kle’an kona-ba razaun téknika no polítika sei ajuda hamenus espekulasaun no mantein konfiansa sosiedade,” hatete Akademista nee.
Entretantu, parte Governu hateten nomeasaun ne’e tuir rekerimentu servisu no lejislasaun ne’ebé vigora, hodi garante estabilidade no kontinuidade servisu estadu nian.
(car)
