DILI, STLTIMORLESTE.com – Primeiru-Ministru (PM), Kay Rala Xanana Gusmão husu jornalista verifika aimoruk iha Sames, antes relata falta stok aimoruk.
Xanana hato’o deklarasaun ne’e ba jornalista sira hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairo Pité, Dili, Segunda-feira (12/10/2026).
Primeiru-Ministru hatete katak, nia foin vizita Sames no husu jornalista sira atu observa diretamente situasaun aimoruk nian antes hato’o informasaun kona-ba falta stok.
“Ha’u foin dadauk ba haree iha Sames. Ha’u ba to’o iha aeroportu, maibé kona-ba stok aimoruk, ha’u la hatene. Ha’u Ministru Saúde ka?” dehan Xanana.
Nia husu jornalista sira atu konfirma se aimoruk falta duni ka lae, no identifika aimoruk saida mak la disponivel. Xanana hatete katak aimoruk foin hatama tan ba fatin ne’e.
PM Xanana hatete, antes viajen ba Tailándia, PM rasik ba too iha Sames. No hare’e Aimorok iha tanba ne’e husu atu indentifika Aimorok Ida ne’ebe mak laiha.
Maski nune’e, jornalista sira relata katak komunidade balu hasoru difikuldade atu hetan aimoruk bainhira sira ba buka tratamentu médiku, no iha kazu balu pasiente sira hetan orientasaun atu sosa aimoruk iha klínika privadu.
Xanana husu jornalista sira atu halo investigasaun kle’an kona-ba situasaun ne’e, inklui verifika informasaun hosi profisionál saúde no disponibilidade aimoruk iha fatin rai aimoruk.
“Husu didi’ak iha Sames, aimoruk iha ka lae? Se dehan iha, maibé la’ós stok out, tenke investiga atu hatene loos,” dehan Xanana.
Primeiru-Ministru mós husu atu investiga se iha posibilidade manipulasaun informasaun kona-ba falta aimoruk, inklui situasaun ne’ebé bele lori pasiente sira ba klínika privadu.
Alende nee Xanana Husu Kontrolu Projetu no Orsamentu
Iha parte seluk, Xanana ko’alia kona-ba projetu ki’ik sira ne’ebé dala ruma demora fulan ualu ka sia, no iha kazu balu to’o tinan ida, antes implementasaun remata.
(eme)
