DILI, STLTIMORLESTE.com – Primeiru-Ministru(PM), Kay Rala Xanana Gusmão relata rezultadu viajen ba Tailándia ba Prezidente Repúblika (PR), José Ramos-Horta.
Xanana hato’o informasaun ne’e hafoin enkontru ho Prezidente iha Palásiu Prezidensiál Nicolau Lobato, Bairro Pité, Dili, Segunda-feira (12/10/2026).
Primeiru-Ministru hatete katak nia viajen ba Tailándia hetan rezultadu pozitivu, liuliu iha esforsu atu atrai investidór estranjeiru hodi apoiu dezenvolvimentu empreza sira iha Timor-Leste.
“Iha Tailándia, investidór sira hakarak mai ajuda ita-nia empreza sira, no Primeiru-Ministru mos hakarak lori oportunidade sira-ne’e mai,” dehan Xanana.
Nia esplika katak, enkontru ho Prezidente ne’e realiza atu relata atividade no rezultadu sira hosi vizita ba Tailándia.
PM Xanana hatete, babain enkontru iha loron Kinta-feira, maibé tanba Prezidente sei viaja ba Austrália tanba ne’e ohin mai enkontru fali iha Segunda.
Xanana nia viajen ofisiál ba Tailándia hala’o hosi 4 to’o 10 Outubru 2026, inklui enkontru bilateral ho Primeiru-Ministru Tailándia, Anutin Charnvirakul, atu hametin relasaun no kooperasaun entre nasaun rua.
Tuir informasaun ofisiál Governu Timor-Leste, diskusaun bilateral inklui komérsiu, investimentu, seguransa ai-han, edukasaun, transportasaun, enerjia no kooperasaun dezenvolvimentu. Área sira-ne’e bele loke oportunidade foun ba ekonomia nasionál.
Vizita ne’e mos importante tanba Timor-Leste sai membru da-11 ASEAN iha Outubru 2025. Timor-Leste no Tailándia prepara atu selebra aniversáriu tinan 25 hosi estabelesimentu relasaun diplomátika iha 2027.
Iha enkontru ne’e Prezidente bolu atensaun foka ba preparasaun El Niño
Aleinde rezultadu viajen, Xanana informa mos ba Prezidente kona-ba prosesu audiénsia públika ne’ebé hahú ona iha Kuarta-feira, tuir nia deklarasaun.
“Kuandu audiénsia públika sira-ne’e hotu tiha, sei tama ona ba diskusaun iha Parlamentu Nasionál,” dehan Xanana.
Iha parte seluk, Prezidente José Ramos-Horta husu atensaun ba preparasaun Timor-Leste kona-ba El Niño.
Preparasaun ba El Niño importante atu ajuda instituisaun relevante sira avalia risku ba agrikultura, bee no seguransa ai-han, no prepara medida apropriada atu hamenus impaktu ba komunidade sira.
(eme)
