DILI, STLTIMORLESTE.com – Primeiru-Ministru (PM), Kay Rala Xanana Gusmão hatete katak, nia seidauk simu pedidu kona-ba aumentu saláriu mínimu ba traballadór sira.
Xanana hato’o informasaun ne’e ba jornalista hafoin enkontru semanal ho Prezidente Repúblika José Ramos-Horta, iha Palásiu Prezidensiál Nicolau Lobato, Bairro Pité, Dili, Segunda-feira (12/10/2026).
Nia hatete katak aumentu saláriu mínimu bele ajuda traballadór sira, maibé desizaun kona-ba asuntu ne’e presiza haree mós kondisaun ekonomia no fonte finansiamentu Estadu.
“Saláriu mínimu, ha’u seidauk simu pedidu. Aumenta ba ne’ebe ba traballadór sira ka ne’e di’ak tebes, aumenta ba US$ 500 para ita bele moris neka Lae?katak Xanana.
Primeiru-Ministru mós temi importánsia Fundu Petrolíferu ba finansiamentu Orsamentu Jerál Estadu. Nia alerta katak bainhira Fundu Petrolíferu menus, Governu presiza buka fonte rendimentu seluk atu sustenta despeza públika.
“Kuandu ita-nia Fundu Petrolíferu menus, atu aumenta saláriu mínimu, ita presiza hasa’e impostu atu hetan osan ba Orsamentu Jerál Estadu,” dehan Xanana.
Xanana mós refere ba manifestasaun kona-ba saláriu mínimu iha Portugal no nasaun seluk, hodi hatudu katak asuntu remunerasaun traballadór nian mós sai preokupasaun iha rai seluk.
Alende ne’e Xanana Komenta Kona-ba Sistema Justisa
Aleinde asuntu saláriu mínimu, Primeiru-Ministru mós responde pergunta jornalista kona-ba problema iha sistema justisa. Nia husu jornalista sira atu komprende katak problema justisa balu la fasil atu rezolve iha tempu badak.
“Se problema sira-ne’e fasil atu rezolve iha minutu lima, entaun Timor-Leste sei la iha problema,” dehan Xanana.
Nia esplika katak, enkontru ho Prezidente inklui diskusaun kona-ba asuntu oioin, no la’ós problema hotu bele rezolve lalais.
Xanana mós subliña katak nia la bele intervén diretamente iha Tribunal, no hatete katak nia komprende limitasaun autoridade ne’ebé nia iha.
“Ha’u labele hatama ha’u-nia liman ba Tribunal. Ha’u hatene saida mak ha’u-nia kargu,” dehan Primeiru-Ministru.
(eme)
