DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba krime Furtu Agravadu neebe mak envolve husi arguidu nain 13, tanba sunu lezada Angelina de Jesus nia uma iha Bebonuk iha tinan 2017.
Arguidu nain 13 nee ho insial IAP, AFL, EJSH, VFSC, SCA, ICTM, AAS, FBS, JCC, AST, NC, NN no OA.
Prosesu refere, antes nee Tribunal rona ona deklarasaun husi arguidu sira, tanba nee iha julgamentu kontinuasaun nee, Tribunal rona deklarasaun husi sasin sira.
Tuir sasin Alfaredo da Costa atualmente hanesan Xefe Suku Bebonuk deklara ba Tribunal katak, los duni iha tinan 2017 akontese sunu uma, sasin nia uma mos iha Bebonuk.
Sasin deklara, iha momentu neeba fulan Maiu, sasin iha Timor Plaza, sasin simu kontaktu husi sasin nia alin, tanba nee sasin mai direta haree joven lubuk ida mak tur hela, too iha neeba arguidu Arsenio mak lori dima duni sasin, maibe sasin konsege tama husi kotuk no haree ahi han uma ona, maibe arguidu sira seluk sasin la haree.
Sasin deklara, konaba motivu saida mak sunu uma, ida nee sasin la iha konhesimentu, maibe sasin nia inan mak iha konhesimentu.
Aleinde nee, sasin Rosito Soares Ribeiro mos deklara katak, arguidu sira hanesan sasin nia kolega.
Sasin deklara, kazu nee akontese momentu sasin iha uma, no sasin haree joven sira mai barak, sasin nia inan mak haree uluk.
Sasin deklara, momentu neeba sasin atu halai sai ba liur, maibe sasin nia inan mak impede sasin, tanba fatuk tarutu iha kalen leten.
Rona tiha deklarasaun sasin nain rua nian, Tribunal marka fali ba iha loron 7 fulan Julhu, oras tuku 5:30 hodi rona alegasaun.
Audensia Julgamentu nee prezide husi Juiz Koletivu , Ana Paula Fonseca, Ersilia de Jesus, Jose Maria, Ministeriu Publiku reprezenta husi Prokuradór Bartolomeo de Araujo, arguidu sira hetan asistensia legal husi Defensor Publiku, José da silva.
Iha indisus katak, loron 30 fulan Maiu tinan 2017, tuku 01:00, lezada Angelina de Jesus (matebian) fila husi Kapela ba nia uma, foin tur derepente rona ema tuda malu no hakilar iha Kapela ho lia makaas dehan, mai ita ba sunu Ala nia uma, la kleur arguidu sira tesik ba hodi tuda lezada nia uma.
Iha momentu neeba suspeitu ida naran bolu Alcino mak foti Bloku no fai ba iha lezada nia janela, foin suspeitu Geovanio halai husi kotuk ba tebe odamatan kios nian no hodi tan fatuk ida riba ba iha odamatan halo odamatan tohar kedas iha klaran.
Tuir mai suspeitu Geovanio haksoit ba loke odamatan, foin arguidu Victor halai ba kios laran hakilar dehan mai ita hemu Dellos, Delos gostu los.
Iha mumentu neeba iha tan suspeitu barak (lezada konhese oin mas la hatene nia naran), balun kaer diman naruk, balu kaer katana, samurai, no suspeitu Ano mak hodi fatuk riba ba odamatan boot uma laran nian too rahun, tanba nee mak iha momentu neeba lezada halai tiha ba uma kotuk, foin ba dada fali nia oan sira ba hotu iha dapur no hateten ba nia oan sira” ema serku ita ona”, la kleur deit arguidu sira sunu lezada nia uma.
Iha altura neeba arguidu sira balun mos hakilar dehan motor labele hasai.
Kuandu Polisia sira too ba mak foin arguidu sira komesa halai, nunee lezada ho nia oan sira mos sai mai hamutuk ho Polisia no Bomberos hodi rega mate tiha ahi.
Sasan sira neebe mak estragus hanesan, sasan kios nian hotu kedas, inklui janela 6 no odamatan 4.
Sasan sira nee nia folin hamutuk US$ 10.142.25 (dolar rihun sanulu, atus ida hat nulu resin rua, centavos rua nulu resin lima).
Konsekuensia direita no nesesariamente husi arguidu sira ninia konduta temi iha leten, halo lezada ninia kios no sasan sira iha laran ahi han mutuk hotu kedas, inklui mos odamatan 4 no janela 6 husi uma prinsipal nian neebe mak at total.
Arguidu sira hatene mos katak tuda rahun odamtan, tama ba iha ema nia uma laran hodi foti sasan no ikus mai sunu ema nia uma no sasan hotu, nudar hahalok krime neebe tuir lei bandu atu halo no hetan kastigu.
Ho nunee, arguidu sira hotu nudar ko-autor Material ho forma konsumada, hodi pratika iha konkursu krime Danu ho Violensia. Insendiu, Furto Agravado neebe previstu tuir artigu 252 husi Kodigu Penal.
(ter)
