DILI, STLTIMORLESTE.com – Xefe Kaza Sivil (XKS) Prezidensia Republika (PR) realiza workshop ho tema fortifika profisionalizmu no etika iha servisu publiku hodi hasae funsionariu sira nia konsiensia oinsa halao knaar ho diak.
Bainhira remata workshop, Tenente Jeneral Reformado, Atual Asesor Prinsipal Prezidente Republika, Lere Anan Timur ba jornalista sira iha Palasiu Prezidensial Nicolau Lobato, Bairo Pite, Segunda (29/06/2026) hatete, ohin Xefe Kaza Sivil realiza seminariu ou workshop ida nee oinsa mak bele hasae konsiensia funsionariu palasiu sira hodi halao servisu ho diak.
“Ohin Xefe Kaza Sivil organiza seminariu ida nee atu fanu funsionariu sira iha prezidensia nia konsiensia liu liu nia nasionalizmu no patriotizmu nuudar servidor estadu, hau hanoin katak formasaun ida nee hanesan Prezidente Funsaun Publika nia mos iha hanoin planu tenke iha instituisaun hotu hotu, primeiru halo oinsa funsionariu sira nee bele hatene ida neebe mak nia dever no ida neebe mak nia direitu,” katak nia.
Jeneral Reformado hatete, durante luta tinan 24 iha ai laran sira laiha direitu, maibe sira nia mak kumpre dever too balun mate iha ai laran, maibe agora ukun aan ona, iha direitu nomos iha dever nuudar sidadaun.
“Nee mak baibain iha fatin fatin koalia konaba sidadania, direitu dever, direitu politiku sosial sira nee hotu, hanesan mos ohin iha seminariu neeba katak hanoin ita nia direitu maibe haluha tiha ita nia dever, ezemplu osan tama tarde mos dala ruma sira foti problema maibe sira mak tama tarde servisu ema ida la foti problema, kuandu falta dala ruma iha justifikasaun oin oin buat sira nee hotu, ida nee presiza fahe hanoin nafatin, ida nee kompara iha ai laran karik ida nee mak bolu dehan katak re-verifikasaun da pratika no komportamentu, Xefe ida idak lider idak idak iha nia gabinete repartisaun tenke akompanha nafatin ninia funsionariu sira nia lalaok servisu diak ka lae? sein duvida hanesan Prezidente Funsaun Publika dehan kada sidadaun funsonariu iha ninia avaliasaun,” katak nia.
Nia hatutan, ema idak idak presiza halo refleta aan liu-liu ba nia komportamentu ba nia servisu no nia rezultadu nee diak ka lae? maibe dala ruma funsionariu husu mak nia notas deit hakarak muito bom maibe lo-loos nee bom mos diak ona maibe hakarak nee muito bom.
Nia hatete, reuniuan sira hanesan nee presiza realiza nafatin labele realiza loron ida deit maibe kontinua nafatin nunee bele fanu funsionariu sira nia hanoin bele hatene sira nia direitu no dever.
Nunee mos Xefe Kaza Sivil Prezidensia Republika, Henriqueta Maria da Silva hatoo agradese ba orador sira neebe mak fahe ona esperensia lubuk ida funsonariu sira nunee bele iha konsiensia liu tan ba estadu hanesan odamatan boot ba nasaun.
“Agradase tanba orador nain 10 mai fanu ita atu hader kaer rasik kuda tali, tanba nasaun iha ita nia liman, nasaun husu ita nia responsablidade, ita sai embaixadores kada ita idak idak ho ita nia hahalok ho ita nia hanoin ho ita nia asaun tomak mak marka imajen prezidensial nia,” katak Xefe Kaza Sivil.
Xefe Kaza Sivil hatete, prezidensia laos instituisaun deit, maibe prezidensia mak funsionariu sira bainhira diak lori imajen diak ba Prezidente Republika, bainhira funsionariu diak serbisu ho responsabilidade ho konsiensia tomak sai eroi ba nasaun ida nee tanba lori imajen diak ba ema idak idak nia aan imajen diak ba prezidensia, imajen diak ba nasaun.
“Ita dignifika ita ida-idak nia aan dignifika Prezidensia Republika dignifika nasaun, tanba nee mak husu ita hotu hotu rona tiha ona esperensia diak lubuk ida neebe orador sira fahe ba ita husu para labele hotu iha nee, husu para ita rona tau iha ita nia konsiensia tomak, ita tau iha ita nia hanoin no ita nia aktus loron loron nunee bele dehan hau vale ba nasaun tanba hau dignifika hau nia aan, hau dignifika Prezidente no hau dignifika hau nia hanoin, nunee povu neebe ita serbi bele orgullu duni ho ita,” katak Xefe Kaza Sivil.
Xefe Kaza Sivil mos iha kompromisu ida hodi fo sertifikadu ba funsionariu neebe partisipa iha seminariu nee maibe lahotu deit iha surat tahan maibe tenke aplika iha serbisu loron ba loron.
Tuir observasaun neebe STL hetan iha seminariu nee partisipa masimu husi funsionariu palasiu prezidensial husi Xefe Kaza Sivil, adjunta Xefe Kaza Sivil, Xefe Kaza Militar, no orador ba seminariu nee mai husi Madre Guilhermina Marcal nuudar membru Konselhu Estadu, Tenente Jeneral Reformado, atual asesor Politika Prezidente Republika, Lere Anan Timur, no Prezidente komisaun Funsaun Publika Agostinho Letincio de Deus.
(eme)
