DILI, STLTIMORLESTE.com – Governu liu husi Ministeriu Saude (MS) simu doasaun makina fase raan hamutuk unidade 10 husi empreza Xineza ho naran WEGO, neebe sei instala iha Hospital António Carvalho Lahane.
Doasaun nee hanesan rezultadu husi vizita Primeiru Ministru (PM), Kay Rala Xanana Gusmão ba Xina iha fulan Abril 2025.
“Ita nia makina sira neebe agora daudaun utiliza tuan ona tanba dezde 2015, neebe kondisaun ladun diak ona, tanba nee ita mai relata ba Primeiru Ministru katak ita simu doasaun makina fase raan nian hodi ajuda pasiente sira neebe presiza fase raan,” hatete Ministra Saude, Elia A. A. dos Reis Amaral, hafoin akompanha emprezaria Timoroan, Clarisia Lay hasoru malu ho PM Xanana Gusmão, iha Palasiu Governu, Kinta (12/06/2025).
Ekipamentu hirak nee entrega simbolikamente no sei instala iha Hospital António Carvalho Lahane ho apoiu tekniku husi empreza.
Iha fatin hanesan, Clarisia Lay nuudar emprezaria Timoroan haree hetan mos difikuldade neebe Governu enfrenta no presiza tulun husi emprezáriu Timoroan sira nian.
“Emprezariu Timoroan barak mak sempre apoia Governu hodi responde nesesidade neebe presiza, laos hau deit, importante mak iha kolaborasaun diak ho parseiru sira husi rai liur. Molok sira apoia, sira too duni Timor hasoru malu ho ita nian nai ulun sira no haree direta difikuldade, sira promete atu apoia ita ho makina fase raan,” nia hateten.
Empreza mos promete katak, Governu Timor Leste bele haruka Timoroan kada tinan nain 30 ba tuir formasaun iha Xina.
Makina sira nee empreza WEGO mak produs rasik, durante nee mos apoia nasaun seluk tanba empreza iha hospital 1000 resin.
(alb)
