SYDNEY, STLTIMORLESTE.com – Prezidente Repúblika (PR), José Ramos-Horta husu estudante no Timoroan sira atu kontinua estuda no hasa’e kapasidade, hodi kontribui ba dezenvolvimentu Timor-Leste.
Prezidente Ramos-Horta hato’o apelu ne’e iha palestra públika iha Universidade Sydney, Austrália, Sesta (16/10/2026), ho títulu “Revizita Demokrasia iha Tempu Turbulentu”.
Nia enfatiza katak joven sira mak futuru nasaun nian, tanba ne’e presiza kontinua buka koñesimentu, liuliu iha área siénsia, teknolojia, medísina no área importante seluk.
“Ha’u nia mensajen ba estudante sira mak estuda, estuda, estuda, estuda iha área teknolojia, medísina no seluk tan,” dehan Prezidente Ramos-Horta.
Nia husu estudante sira atu uza koñesimentu no kapasidade ne’ebé hetan husi estudu hodi kontribui ba progresu no dezenvolvimentu nasaun.
Estudante bolseira Timoroan iha Austrália, Cristi Bella Pioneiro do Santos, mós afirma katak nia sei kontinua aprende no hasa’e kapasidade liuhusi estudu iha Sydney, hodi fila fali ba Timor-Leste no kontribui ba nasaun.
“Nu’udar Timoroan no feto, ha’u orgullu tebes reprezenta ha’u nia nasaun doben, Timor-Leste. Ha’u hamriik ho brani nu’udar feto atu kontinua aprende no estuda, no aprende buat ne’ebé Universidade Sydney oferese hodi ajuda ha’u kontribui ba dezenvolvimentu Timor-Leste,” dehan Cristi Bella.
Nia esplika katak, koñesimentu, lisaun no esperiénsia prátika ne’ebé hetan iha universidade sei sai hanesan patrimóniu importante atu lori fila ba Timor-Leste.
Cristi Bella mós subliña katak, responsabilidade atu estuda no dezenvolve nasaun la’ós estudante sira nian de’it, maibé Timoroan ida-idak tenke iha kompromisu atu kontribui liuhusi asaun konkreta.
“Estuda ne’e la’ós estudante de’it mak tenke estuda, maibé nu’udar Timoroan ida-idak, ita iha responsabilidade boot. Ita labele ko’alia barak de’it, maibé tenke estuda no hatudu iha asaun,” nia hatete.
Nia mós hato’o agradese ba programa bolsa estudu Austrália ne’ebé fó oportunidade ba nia atu kontinua aprende no dezenvolve kapasidade.
Nia enkoraja estudante Timoroan sira iha rai-li’ur no rai-laran atu kontinua buka matenek, aprende husi esperiénsia no koñesimentu husi nasaun oioin, no lori koñesimentu ne’e fila ba Timor-Leste.
Cristi Bella afirma katak, mensajen Prezidente Ramos-Horta nian iha palestra ne’e sai hanesan motivasaun ba estudante sira atu la para buka koñesimentu.
Prezidente Ramos-Horta mós apela ba estudante no Timoroan sira atu kontinua hadi’a rekursu umanu, hasa’e kapasidade intelektuál, profisionál no téknika, hodi bele responde ba nesesidade dezenvolvimentu nasaun.
Nia destaka katak, koñesimentu no kapasidade iha área setór públiku, saúde, edukasaun, agrikultura, turizmu no área seluk importante tebes atu hametin dezenvolvimentu Timor-Leste nian.
(eme)
