DILI, STLTIMORLESTE.com – Komunidade Aldeia Likorapoma, Suku Bairo Pite, Dom Aleixo, Dili, hamoos valeta kada semana atu asegura bee suli di’ak no prevene susuk.
Komunidade Saturnina Sarmento afirma katak, limpeza valeta importante atu mantein ambiente moos, prevene bee taka no evita fatin ne’ebé bele sai abrigú ba susuk.
Nia hatete ida-ne’e ba STL iha Bairo Pite, Sesta-feira (16/10/2026), bainhira ko’alia kona-ba atividade limpeza ne’ebé komunidade hala’o regularmente.
“Ami hamoos valeta kada semana atu bee suli di’ak no evita susuk, tanba dala ruma plastik no lixu seluk taka bee,” Saturnina dehan.
Tuir nia, valeta dala ruma nakonu ho bee-mamuk, plastik no lixu seluk, tanba labarik sira soe lixu bainhira halimar iha valeta nia ninin.
Nia esplika katak, situasaun ne’e obriga komunidade atu kontinua halo limpeza regularmente, hodi asegura valeta la taka no ambiente hela moos.
Saturnina mós apela ba komunidade, liuliu inan-aman sira, atu tau matan ba labarik sira, hodi labele soe lixu arbiru ba valeta.
Nia enkoraja sidadaun sira atu hamutuk mantein limpeza ambiente no kuidadu valeta, hodi prevene bee taka no susuk iha área rezidensiál.
(jac)
